Nuştox J. Îhsan Espar kitabê xo yê bi nameyê Bêrîyê Birîsmênî Amed de buroya Gruba Vateyî de îmze kerd. Îmzekerdişî ra zaf hûmarî de heskerdoxê ziwanê Kurdî beşdar bîyê. J. Îhsan Espar heme şîîranê xo no kitab de kom kerdo.
Îhsan Espar kam o
J. Îhsan Espar 1956 de Pîran de dayîka xo ra bîyo. Amed de Enstîtuyê Perwerdeyî qedînayo û yew demo kilm zî mamostetîye kerdo. Serra 1983î de şîyo welatê Swedî û nika uca de maneno. Espar Unîversîteya Stockholmî de tarîx û averşîyayişê ziwan û ciwananê diziwanîyan û Gavle de zî îlmî cematkî wendo. Serra 2001î ra nika zî redaksîyonê Kovara Vateyî û redaksîyonê kitabanê gedeyan ê Weşanxaneyê Apecî de ca gêno. Çend kitabê bînî yê Îhsan Esparî yê ke verê cû amê çapkerdiş wina yê: Rengê Şewe Zerrîya Mi De, Tanî Estanikî û Deyîrê Ma, Beyi Se Bena?, Dilopê Zerrî, Sanikeka Heskerdişî. Kitabê ke Îhsan Esparî açarnayî: Dêrê Santa Ragnhild De - Hesenê Metê (Kurmanckî ra), Robinson Crusoe - Daniel Defeo (Swêdkî ra)
AMED