KCK û Koordînasyonê KJKyî vera padîyayîşê dezgehanê Tevgera Azadî û RJAKî de îzehetêk dayî. Koordînasyonê KJKyî dîyar kerdo padayîşê dezgehan tena xizmetê dişmenanê kurdan keno û waşto ke wa fek nê kerdiş û qeraran ra verabidî.
Çend rojî verê Başûrê Kurdîstanî de dezgehê Tevgera Azadî û RJAKî hetê hukmatê Başûrê Kurdîstanî ra ameyî padayene. Vera padayîşê dezgehan de reaksîyonî her ke şono zêde benî. Hemserekîya Konseyê Caardişî yê KCKyî û Koordînasyonê KJKyî îzehet dayî.
Hemserekîya Konseyê Caardişî yê KCKyî ard ziwan ke no demo ke lazimîye zaf bi yewbîyayîşî esto de Başûrê Kurdîstanî de padayîşê buroyanê Tevgera Azadî seba şar û sîyasetkaranê kurdan nîno qebulkerdene.
KCKyî vato ‘her kes zano ke PDK û YNKyî rîyê zext û şantajê dewleta tirkî ra qerarê padayîşî girewto’ û wina dewam kerdo: “Ganî sîyasetê kurdan de bi zextê hêzanê teberî hemverê partî û grûbanê bînan ê kurdan de nêro vindertene. Sîyasetê kurdan heta ke naye ra fek vera nêdo ne eşkeno xo hêz bikero ne zî têkoşîn bido. Sîyasetê kurdan hêzê xo şarî ra gêno. Coka eke tekîlîya demokratîke ya hêzanê kudan ê sîyasîyan bibo ê eşkenê heme meseleyan zî çareser bikerî.”
KCKyî wina domnayo: “Vera zextê hêzanê teberî de milê xo çewtkerdiş û nê bingeyî de hemverê partîyanê sîyasî yê kurdan de vindertiş goreyê welatperwerîye nîyo. Aye ra no nizdîbîyayîşê YNKyî tena înan rê îtîbar dano vîndîkerdene. YNK ganî bi esas girewtişê xeta Mam Celalî tê bigêro. YNK eke verê dişmenê kurdan de milê xo çewt bikero, zirar dano heme kurdan.”
Zirar dano heme kurdan
KCKyî peynîya îzehetê xo de wina vato: “YNK ewro herinda ke vera qerarê Amerîka yê 3 rayberanê sîyasî yê kurdan de vindertişî de buroyanê Tevgera Azadî qefilneno. Çîyo winasî nîno qebulkerdene. Ganî heme dezgehê sîyasî û demokratîkî yê kurdan paştî bidê Tevgera Azadî û vera neheqîye de bivejîyê.”
Fek nînan ra verabidê
Koordînasyonê KJKyî zî padîyayîşê dezgehanê Tevgera Azadî û RJAKî ser o îzehetêko nuştekî da. KJKyî va ‘padayîşê nê dezgehan ti eleqeyê xo bi welatperwerî, erjê demokratîke û sewbîna reyde çin o’ û wina dewam kerdo: “Tîya de o yo ke qezenç keno, AKPyo faşîst o. No qerar goreyê welatperwerîya şarê ma yê Başûrî nîyo. Şarê ma yo Başûr heta nika qet vera dişmenan de û polîtîkaya înan ya teslîmgirewtişî de sere nêronayo. Proseso ke yewîya neteweyî tede yena qiseykerdene de çîyêko winasî kerdene, xizmetê dişmenanê xo kerdene yo.”
Wa cinîyî vera nînan de bivinderî
Koordînasyonî îzehetê xo de dayo zanayene ke ê tarîxo nizdî ra zî zanî ke îttîfaqê ke îqtîdaranê dişmenan reyde ameyî ronayene, ti feyde nêdayî şarî û wina vatî: “Waştişê dişmenan o yo ke hêzanê kurdan bîyarî dûştê yewbînanî. Seke Cegerxwînî zî vato ‘eke ma nêbî yewe, ma çin benî yew bi yew’. Ma veng danî îdareyê Başûrê Kurdîstanî û YNKyî, wa fek nê kerdiş û qeraran ra vera bidî. Wa cinîyî vera nê kerdiş û qeraran de bivinderî.”
ANF / BEHDÎNAN