KNKyî keye û embazanê Dîyar Xerîbî rê serweşîye waşte û wina vato: “Ma heme têkoşîndayox û xemwerdoxanê Kurdistanî ra wazenê ke dereceya xebata xo bikerê berze û hîna bicesaret hemverê dagîrkerîye de vinderê.”
Konseyê Caardişî yê KCKyî 2 rojî verê eşkera kerdbî ke netîceyê hêrişê hewayî yê artêşa Tirkî de endamê Konseyê Serekîya Pêroyî yê KCKyî Dîyar Xerîb û gerîlayê bi nameyê Şahîn û Devran şehîd bîyî.
Konseyê Caardişî yê KNKyî seba şehadetê endamê Konseyê Serekîya Pêroyîye yê KCKyî Dîyar Xerîbî eşkerayîyêka nûştekîye weşanaye. Eşkerayîye de ameyo vatene ke Dîyar Xerîb dimayê xebat û têkoşînê 25 serran a fedakarîye û dûrê menfaatanê şexsîyan û keyeyî netîceyê bombardûmankerdişê dagîrkeran de şehîd bîyo.
KNKyî şarê Kurdistanî, embaz û keyeyê Dîyar Xerîbî rê û merdimanê têkoşîndayoxanê ke ê dir şehîd bîyê rê serweşîye waşte û vat rayîrê fedaîyan her tim serkewtiş o. KNKyî bale ante ke bê ajanîye û xorotişîya xomîyanêne dewleta Tirkî Anqara ra nêeşkena şopa têkoşîndayoxêkê Kurdî bivîno û vat bi paştdayîşê ajanîya xomîyanêne no qirkerdiş virazîyayo.
Seba terorîzekerdişê Kurdan bi kar şuxulnenê
KNKyî hukmat, parlemento û her tewir îdareyanê Başûrê Kurdistanî ra waşt ke mesuldarîyanê xo bîyarê ca û vernî ro ajanîya xomîyanêne bigêrê. KNKyî dewamê eşkerayîya xo de wina vato: “Eşkera yo ke dagîrkerê Kurdistanî zereyê krîzanê sîyasî, leşkerî û ekonomîkan ê pîlan de yê. Roje bi roje hîna zaf benê bêîrade û bêmoral. Na yewe ra heme hêzê xo seba terorîzekerdişê şexsîyetanê Kurdan şuxulnenê. Ê û ma zî zanê ke nêmendişê Dîyar Xerîbî û embazanê ci çende dejêko pîl bo zî, ca û meqamê înan veng nêmaneno û netîce de serkewtiş ê Kurdistanî û şarê ci yo. La birîna ke bi destanê xomîyanênan virazêna derman nêbena.”
Wa vernîya ajanîye bigêrê
KNKyî eşkerayî wina qedênayo: “Ma heme têkoşîndayox û xemwerdoxanê Kurdistanî ra wazenê ke dereceya xebata xo bikerê berze û hîna bicesaret hemverê dagîrkerîye de vinderê. Yewbînan rê wayîr vejîyê û şarî vera îxanetê xomîyanênî de haya bikerê. Ma îdareyê Başûrê Kurdistanî ra wazenê ke wa vernîya ajanîye û îxanetê xomîyanênî bigêrê û no gureyo pîroz o ke milê înan ser o yo bica bîyarê.”
Heto bîn ra seba Endamê Konseyê Serekîya Pêroyî yê KCKyî Dîyar Xerîbî bajarê Silêmanî de tazîye ameya ronayene. Badê ke ame eşkerakerdene ke Xerîb û 2 gerîlayê bi nameyê Devran û Şahîn şehîd bîyî, herkes vera xo dano keyeyê Xerîbî ke Silêmanî de yo û keyeyê Xerîbî rê serweşîye wazenî.
SILÊMANÎ
Dîyar Xerîb bi destê hemkaran şehîd bi
Berpirsîyara Karê Teberî ya Merkezê YNKyî Şanaz Îbrahîme şehadetê Dîyar Xerîbî ser o keyeyê Xerîbî rê serweşîye waşte. Şanaz Îbrahîme va ‘Embaz Dîyar Xerîb bi destê dişmenanê Kurdan û hemkaranê înan ame şehîdkerdene’ û wina domnaye: “Dîyar Xerîb bi fedakarîyanê girdan demêko derg têkoşînê azadîya Kurdan de ca girewt. Ez sere de keyeyê ci rê, endamanê Konseyê Serekîye yê KCKyî rê û şarê Kurdî rê serweşîye wazena. Ez vileyê xo vernîya têkoşîn û xebatanê Dîyar Xerîbî de çewt kena. Şehadetê Dîyar Xerîbî ma zaf dejnayo. Têkoşîno ke Dîyar Xerîbî dabi do heta peynîye bidomîyo. Ez heme embazan silam kena.”