Kongreya Neteweyîye ya Kurdîstanî (KNK) bi wesîleya serrgêra 32. ya Qirkerdişê Enfalî eşkerayîyêke daye. Qirkerdişê Enfalî de 182 hezar kesî ameybî qetilkerdene. Eşkerayîya KNKyî wina ya: ''Qirkerdişê Enfalî asta tewr berze ya sîyasetê şovenî ya Baasî bi. Parçeyanê bînan ê Kurdistanî de zî pê metodanê cîyayan Qirkerdişê Enfalî ame caardene. Heta nika îşxalkeran seba çareserîya meseleya kurdî gamêke nêeşte. Gelo vera nê kerdişanê îşxalkeran de wextê ci nêameyo ke kurdî pê sîyasetêkê hemparî cewabê nê qirkerdişan bidê? Wextê ci nêameyo ke seba stratejîya neteweyîye gamêke bierzê? Sey Kongreya Neteweyîye ya Kurdistanî ma reyna bi rêzdarî pêro qurbananê Enfalî yad kenê. Ma îqtîdarê Iraqî û hukmatê Herêma Kurdistanî ra zî wazenê ke waştişê şarê Enfalî ca bîyarê. Qet nêbo tazmînatê madîyî bidê û seba înan cuyêka başe peyda bikerê.'' KNKyî venga şarê Kurdistanî, rêxistinanê sîyasîyan, rêxistinanê komelê sivîlî û eşîranê Kurdistanî da ke seba yewîya neteweyîye gamêke bierzê ke hînî qirkerdişê sey Enfalî nêrê kerdene.” MERKEZÊ XEBERAN