DELÎL ZÎLAN/ANF/BEHDÎNAN
2 wayî, 2 hevalî… Şîmal Amara û Dorşîn Şîmale. Wayan ra yewe 2006 de Amed de beşdarê gerîla bena. Waya bîne zî waya xo ra 5 serrî dima ra beşdarê têkoşînê azadî bena. Bi serran waranê cîya-cîyayan de manenî û tewr peynî Warê Pawitişî yê Medya de raştê yewbînan yenî.
Her di wayî babete ser o qisey kerdî û hîsê xo ardî ziwan.
Sifteyîn waya pîle Şîmal Amaraye qisey kerde û wina va: “Mi 2006 de vera tecrîdo ke Rayberî ser de estbî de qerar girewt ke ez beşdar biba. Tesîro tewr gird yê qerarê mi de şehadetê Embaz Serhildanî estbî. Ez şehadetê ci ra zaf bitesîr bîbîya. Mi waşt ez o wext beşdar biba, labelê seba ke emrê mi şenik bî, nêverdayî, ez zî 2006 de beşdar bîya. Ez wexto ke Çarçela de tedawî de bîya, embazan nîşeyêk mi rê ardî. Verê mi fotografî nêşinasna, labelê wexto ke mi nîşe wend, mi fam kerd ke waya mi zî beşdar bîya. Ez zaf biheyecan bîya û no qerar seba mi zaf muhîm bî. Seba mi bîbî moralêko gird. Ma ge-ge cîhaz ser ro qisey kerdênê, labelê ma raştê yewbînan nêameybî.”
Ez nêşîna şinase bikera
Şîmale dewamê qiseykerdişê xo de va ‘mi mîyanê cilanê gerîla de waya xo zaf meraq kerdêne’ û wina domnaye: “Wexto ke ez ameyêne tîya, mi aye hewnê xo de dîyêne. Mi verê cû fotografê aye dîybî. Merdim nêşêno nê hîsî şinase bikero. Embazan henekê xo ma kerdî. Embazî şonî waya mi ra vanî ‘Şîmale nêweş a û wazena to bivîna’. Dima ez ewnîyaya ke Embaza Dorşîne yena. Merdim nêşêno ê hîsan şinase bikero. Seba eynî doze têkoşîn dayîş, embazê sîlehî bîyayîş, hîsêko cîya yo. Şinaseyêko hîrêyin lazim o, labelê mi mefhûmêk nêdî.”
Ez tim gêrayêne
Wayan ra Dorşîne zî va ‘badê ke Şîmale beşdar bîye, zextê dewlete keyeyî ser de hîna zêde bîyî’ û wina dewam kerde: “Dima ra mi zî qerar girewt û 2011 de ez beşdar bîya. Wexto ke ez beşdar bîya, tim mi Şîmale gêrayêne. Badê ke ez Amed ra beşdar bîya, şîya Dêrsim. Ti kes embaza Şîmale nêşinasnayêne. Mi nîşe erşawitêne labelê cewab nêameyêne. Şîmale zaf hêz dana mi û têkoşînê aye moral dano mi. Embazan ma rê henekêk kerdî û mi ra vatî ke Şîmale zaf nêweş a. Mi zî xo bi xo va ‘ma hîna yewbînan nêdîyo, gelo ya şona’. Badê ma yewbînan dî û ma hîrê rojan hetê yewbînan de mendî. Ez nika hîsanê cîya-cîyayan cuyena û vana qey hewn o.”