Erdê Kurdistanî de bi hezaran cu û hîkayeyê şerwanan estî. Kesê ke Şorişê Rojawanî ra tesîr bîyî û beşdarê şorişê azadî bîyî, zaf î. Rojawan de çeteyê DAIŞî nêeşkayî vera şerwanan de bivinderî û bi no hawa Kobanê serkewt. Hêzê teber û çeteyê DAIŞî omid kerdênê ke Kobanê do bikewo destê înan. Labelê netîceyê Şorişê Rojawanî sey hesabê înan nêbî û Kobanê de şorişê azadî, ruhê embaztî serkewt. Arjîn Kobanê ya ke dewa Xor Xorî de ameya dinya, şerê kantonê Cizîrî, Til Hamîs, Ceza, Serêkanîyê û Til Koçer de ca girewt. Arjîn Kobanê badê beşdarbîyayîşê xo mîyanê embazanê xo de wendiş û nuştişî musaye. Babete ser o Arjîn Kobanêye qisey kerde.
Bêomidî çinêbî
Arjîn Kobanêye qiseykedişê xo de qala embazê xo yê ke şehîd bîyî, kerde û wina va: “Tena yew hedefê mi esto, o zî heyfgirewtişê embazê mi yê ke mi ver de şehîd bîyî yo. Şerê Rojawanî de bêomidî çinêbî. Kewtişê Kobanê ameyêne manaya kewtişê heme erdê Rojawanî. Şerê Kobanê bi moral û fedakarîyê embazan serkewt. Çeteyanê DAIŞî bi tanq, top, hawan, dokça û fuzeyan ameyênê ma ser de. Embazî her çiqas ke rincan, vêşan û bêhewn mendênê, reyna zî şer kerdênê û destê xo sîlehî ra nêantênê.”
Nîno vîrîkerdiş
Arjîn Kobanê bale ante hesabê ke hêzê teberî înan ser de kerdênê û qiseykerdişê xo wina qedênaye: “Dewleta tirk û Serekkomarê înan paweyê kewtişê Kobanê bîy. Ez taxa Azadî de birîndar bîya. Engiştê wirdî destê mi zî qerefîyayî û vînayîşê çimê mi zî kêmî bîyî. Mi Amed de tedawî dî. Şerê Kobanê de fedakarîya şarê Vakurî nîna vîrîkerdiş. Ez bi motîvasyonê şarê Vakurî weş bîya. Embazê ma her çiqas ke bîyênê gazî, reyna zî vera çeteyan de tewr vernî de şer kerdênê.”
SÎNAN DENÎZ / KOBANÊ - ANF