HÊZA HESEN ANHA/KOBANÊ Bitaybetî Kobanê û pêroyî de zî şerê Rojawanê Kurdistanî de xeylê bedelî ameyî dayene û bi hezaran domanî yetîm mendî. Bi destekê Weqfa Cinîyanê Azadan ya herêma Cizîrî, hetê Weqfa Cinîyanê Azadan ya herêma Firatî seba domanê ke şerê Rojawan û Sûrîye yetîm mendî, Kobanê de Keyeyê Bêkesan akeno. Weqfa Cinîyanê Azadan serra 2015î de dest bi projeyê Keyeyê Bêkesan kerdbî û xebatî qedîyayî. Domanî tîya de do bi Kurdî, Erebkî û Îngilizkî perwerde bivînî û eynî wext de perwerdeyê teknîk, huner û sporî zî bivînî. Aşma Tebaxe de do 50 domanî tîya de bimanî û 18 cinîyî ameyî wezîfedar kerdene. Selahîyetdarî dîyar kerdî ke keye do bi nameyê Keske Soran Alanî de bêro akerdene. Temsîlkaranê weqfe ra Fîdan Dirêîye babete ser o wina va: “Keyeyê Bêkesan seba ke domananê yetîman verik bikero û problemanê înan çareser bikero yeno akerdene. Tîya de yeno hedef kerdene ke perwerdeyê kultur û sewbîna bidîyo domanan.”