Serra 2014 de bajarê Kobanê yê Rojawanê Kurdistanî de şerwananê kurdan vera çeteyanê DAIŞî de xoverdayîşêko tarîxî nîşan da û nameyê xo bi herfanê altûninan tarîx de nuşt. Dima ra 1ê Teşrîna peyêne sey Roja Kobanê ya Dinya ame îlankerdiş.
Fermandaranê YPJyî ra Meryem Kobanêye derheqê muhîmîya na roje de qisey kerde û vînayîşê xo arde ziwan. Fermandare Meryeme Kobanêye destpêkê qiseykerdişê xo de 1ê Teşrîna peyêne Roja Kobanê ya Dinya pîroz kerde û dîyar kerde ke xoverdayîşê Kobanê nasnameyêko cîhanşumul girewto û sebebê ci zî o yo ke Kobanê de vera faşîzmî de erjê merdimîye ameyî pawitiş. Fermandare Kobanêye şexsê Ebu Leyla, Dîyar Bagok, Gelhat Gever, Hebun Dêrik, Paramaz Kizilbaş de heme şehîdanê Kobanê yad kerde.
Fermandare Kobanêye va ‘Kobanê de rayberîya şerwanê YPJyî yê Revane, Helîne, Arîne, Destîna, Hebun û Saryayan de xoverdayîşêko tarîxî ame nîşandayîş’ û wina domnaye: “O wext wexto ke nameyê DAIŞî ameyêne eşnawitiş, bajarê ke nufûsê înan bi mîlyonan ameyêne hûmaritiş, veng bîyêne û dewletî bêçare mendêne. Heme merdimîye binê zextê çeteyanê DAIŞî de bî û lazimîya vindarnayîşî ya nê hêrişan estbîye. Na lazimîye zî hetê şerwananê YPG û YPJyî ra ame ca. O wext seba Kobanê wijdan û qelbê heme dinya seba Kobanê eştênê. Tarîx de prosesê winasî ancax donemanê zehmetinan de vejîyenî orte. Kobanê de merdimî bi felsefeya Rayberê Şarê Kurd Abdullah Ocalanî xover dayî û vengdayîşê seferberîya ke Ocalanî seba Kobanê kerdbî, bajarê Kobanê xelisna. Ewro ereb, tirkmen, suryanî û sewbîna heme şarê bînî zî Ocalanî sey rayberê xo qebul kenî. Se beno wa bibo, kam fek veradano wa verabido, labelê ma cinîyî qet do Kobanê ra fek veranêdî û ma do wayîrê ci bivejyî.”
Kobanê bîye sembolê dinya
Fermandar Kobanêye wina dewam kerde: “Ma tena seba cinîyanê kurdan nê, seba heme cinîyanê dinya xover da. Kobanê de hem şerê îdeolojîk û hem zî yê leşkerî ame dayîş. Ma Kobanê de zanayêne ke ma seba heme azadîwaştoxanê dinya şer kenî; ma bi nê ruhî şer kerd. Cok ra Kobanê bîye sembolê dinya. Herçiqas ke ma hetê hûmare de kêmî bîye, labelê reyna zî ma bi cesaret, bawerî û qerardarî nîşan da û heta peynî ma şer kerd. Raştîya xo de xoverdayîşê Kobanê ruhê yewîya neteweyî awan kerd. Waştişê ma o bî ke heme hêzê kurdan seba pawitişê Kobanê hewl bidî. Qasê nane, awe û hewa lazimîya ma bi yewîya neteweyî esta. Ma ewro seba Federasyonê Vakurê Surîyeya Demokratîke û Sûrîyeya Demokratîke têkoşîn danî. Ma do sere de dewleta tirk û heme dagîrkeranê bînan erdê xo ra biqewirnî.”
ANF/BEHDÎNAN