Kobanê dilê mazlûmêy dinyayî de paytexteke xoverdayişê verbê kapîtalîzmî ameya sinasnayiş. Kobanê warê qehremanêy ke semedê aştî, aramî û birateya heme şaran û merdiman ganê xo dayê yo. Kobanê qela kesêy aştîya dinyayî wazenêy, kesêy ke verba xirabekerdişê ekodengeya xoverdayiş danêy de ya. Kobanê pawiyayişê temînata xozaya dinya, xozaya feza û gerdûnî ya. No semedî ra lazimo ke şaristanê Kobanê de cayêy ke şerî de xan û xirabe bîyê bibo muzeyeke akerde ya UNESCO yî. Kobanê eke bibo muzeyeke akerde se, tûrîstêy herêmî û navnetewî semedê ke paytexta Dilê Mazlûmêy Dînyayî, paytexta xoverdayişî bivînê do zîyaret bikerêy. Ney semedî lazimo ke Kobanê newe ra bêro înşakerdiş. Ma şikyeni vajê bi destpêka şer ê Kobanê ra heta serkewtişê qehremanê Kobanê, merdimêy dinyayî bîy çar tewr û het tepiştîy. Ma tewrêy merdiman ser de tikey bivinderêy.
Merdimêy sift bay êy
No tewrî de; kurdêy ke bi dildarî kurdewar bîy û kurdêy ke heta destêy înan ra ame hetkarî day şerwanan, şarêy Kobanê, Şengal û Rojawanî ca genêy. Nînan mîyan de kurdêy ke heme bawerîyan ra bi duayê xo qûantûm viraştîy û şirawitîy Kobanê û verbê çeteyê terorîst DAIŞî, bi duayê xo şer kerdîy zî estêy. No tewr merdimîy verkeşeya aştî û birateya merdiman û xozaya dinya û fezayî kenêy. Dilê zafêreya ney tewrî de qehremanî û şerwanîya semedê merdiman est o. Dilê înan de şer û polîtîka gemar çîn o. Semedo ke şerwaştoxîy wazenêy înan qirbikerêy ra mecbûrî qehremantîya xo ya zey Kobanê mojnenêy. DNAyê nêy kesan de bi xozayî cuyayiş, denga ekolojîyî pawiyayiş, her tim neheqîyan ver de vindertiş û xoverdayiş est o.
Dewştê hêrîşkar
Tewrê diyin de, ‘merdimêy’ çetey ke verbê kurdan şer kerdêy û dewletêy ke heme tewran de hetkarî dayê çeteyan ke kurdîy serkewte nêbêy û berêy qirkerdiş ra xizmet kerdêy, ca genêy. Mîyanê ney tewrî de hetê dewletê kapîtalîst, seyîra 70-80’yê mislimanêy ke dinyayî de ca genêy û zilma ke kurdan ser de bîyê ra vengê xo nêvetîy, mûyê xo nêleqnay û hîrê meymûnan kay kerdîy zî estêy. Heta kurdan mîyan de zî no tewr mislimanîy seyî ra 2-3 ke vatê ‘ez misliman a’ zî ney tewrî de cayê xo girotîy. Nêy kesîy semedê aştî û birateya şaran, semedê xozayeke ekolojîk zaf talûke yê. Nêy kesîy bi mezgê xo nê, bi mezgê kesêy ke bawerîya înan pawenêy bawer kenêy. No tewr mezg zî beno semed ke, kapîtalîzm bi bawerîya înan yanê bi dînan mîyanê şaran de şer bivejo. No tewirî de tenê îslamîyet nê, heme dînan ra merdimîy estêy û bi pîjkerdişê dewletan şarên baş mîyan de şer vejenêy.
Kobanê wa bibo muze
Semedêy ke Kobanê bibo muze zaf êy. Bi kilmî ma ser de bivinderê. Semedo ke nîmeyê nûfisa dinyayî destê mezgê lîberalan de yo, talûke gird o. Encamî de nêy kesan de sereyeke û mezgeke esto û ma şikyenê bibedilnê. Bi temamî nêbo se zî, ma şikyenê bi muzeyê akerde ya zey Kobanê, mezgê înan ê lîberalîzmî de bi canê înan bidê hîskerdiş, bi çimêy înan zî bidê famkerdiş ke kapîtalîzm şerke senî peyda kerdo û encamê ci reseno çicayan. Bi ney hawayî ma şikyenê înan lîberalîzmî ra bikê komînalizmî mîyan. Muzeyeke akerde do no tewr merdiman ser de tesîreke gird bikero. Semedo ke no tewr merdimîy rayîra raştî bivînê lazimo bi çimêy xo çîyan bivîno ke bawer bikero.
Goreya taxmînan, famkerdişê raştvînayişê merdimêy dinyayî de cuyenêy seyîra 98’in bi çimêy xo bivînê se, hîna rew bawer keney. Seyî ra 20’êy merdimêy dinyayî semedoke hîs kerdêy û bi çimêy xo vînayê bîyê merdimêy baş û wazenêy ekolojîkeya dinyayî de bê dewlet bicuyê. Kobanê bibo muze se, do zaf şarîy bivînê ke kurdo ke bê dewlete bi, verba kamcin dewletan, semedê çî, bi çi hawayî serkewtişa azadî giroto destê xo û verba kapîtalîzma dinyayî de raya sifteyin numûneyeke wina peyda kerdêy. Nimûneya Şerê Çanakkaleyî ma bidê. Şerî de bi deshezaran merdimêy dinyayî cuyayişê xo oca de vinî kerdîy. Ewro Gelîbolî muzeyeke akerde yo û her roj bi hezaran merdimey dinyayî şinê oca zîyaret kenêy. Pekî çira Kobanê nêbo muzeyeke akerde! Ma kurdîy bi xoverdayişê qehremanêy şerwanêy kurdan Kobanê kerd Paytexta Dilê Mazlûmêy Dinyayî.
NAVENDA XEBERAN