Amed de 7 cinîyê ke amey têhet bi munasebeta 8'ê Adare Roja Cinîyê Kedkarî yê Cîhanî, Koma Erbane yê bi nameyê Mizgîn ronayî. Na komî Gurbet Aydin ra, bi nameyê bîn Hozan Mizgîn ra îlham girewto.
Endamê komê cewab danê persa çima nameyê Mizgîn dayo kome û anê ziwan ke, “Hozan Mizgîn şoreşger û hunermenda ewil bî. Temsîlkara tarîxa tewr bi jan bî. Mîraso ke ay seba ma verda xêlê gird o. Ma wazenê wayîrê no mîrasî bivejyê.”
Endamanê na kome ra Mizgîn Daghan zî bi nê vatenan behsa sebebanê ronayişê kome kerd: “Zey cinî ma emeg danê cîhanî û çerxa dinnya ma çarnenê. O wext ganî ma wayîrê emegê xo bivejyê. Eke her kes cayê xo ra veng bido, do paştîdayîşê ma cinîyan do xort bibo û girdêr bibo. Ma zî bi karê xo yê muzîkî waşt quwet bidê na paştîdayîşî.”
‘Xêlê bedelî amey dayen’
Daghan aşkere kerd ke hinî ê nêwazenê dor bîro kesekê bînî û wina va: “Doman mendî, genc, cinî merdî. Bedelê girdî amey dayen, hinî wa biqedîyo.
Daghan vist vîrî ke cinî do 8'ê Adare de pîya meydanan de bê û bi nê vatenan qiseyanê xo qedêna: “Eke şima wazenê civakî bivûrne, ganî sifte cinîyan bivûrnê. Eke ma azadî wazenê, gfanî ma îradeyê xo yê azad damûsnê. Nayî ra ganî ma meydanan de 8ê Adare de newayanê xo cinîyan ra pîya vajê û tekoşîna xo xort bikerê.
AMED