Komên çete li himberî îradeya berxwedanê ya YPG’ê di qada şer de têk diçin. Nema dikarin rû bi rû li himberî şervanên hêza Kurd bisekinin û neçarî paşvekişînê dibin. Ev yek di heftiya derbasbûyî de li meydana şer li Çilaxayê diyar bû. Komên çete bi dehan kuştî û birîndar windahî dan. YPG’iyan jî dest danîn ser çend tankên wan. Ev yek serkeftinek stratêjîk e, lê bi xwe re gelek metirsyan jî diafirînê. Yek ji van metrisiyan ewe ku komên çete wê dest bi çalakiyên xwekujî û şandina erebeyên bombebarkirî bikin. Ev yek di êrîşa vê dawiya ya li ser riya Amûdê de diyar bû. Ev êrîş bi erebeyên bombebarkirî bi riya 2 terorîstên xwekuj pêk hat. Di encamê de 7 kes şehîd ketin.

Divê YPG û hêza Asayişê di dema pêş de tedbîrên cidî derbarê ewlekariya heremên Rojavayê Kurdistanê de bigrin. Armanca terorîstan dê navendên bajarên mezin bin, mîna Qamişlo, Hesekê, Efrîn, Kobanê, Amûdê, Dêrik û Dirbêsiyê. Divê kontrol were xurtkirin û hemû welatî bi Asayişê re hevkar bin. Kîjan erebeyan xerîb an jî ferqkirina livek cihê gumanê, divê yekser Asayiş bê agahdarkirin. Her wiha divê kesên biyanî yên ji navenda Sûriyeyê ji ber şer revyane û xwe li herem û bajarên Rojava girtine, bêtin lêpirsîn, nav û navnîşanên wan bên qeydkirin. Divê ji bo wan dokumentên rûniştinê bên dayin. Dema rûniştinê diyar be û bi çend mehan bê çarçovekirin. Eger tiştek di warê ewlekariyê de li ser kesên mijara gotinê nebe, dema rûniştinê dikare bête dirêjkirin.
Komên çete yên ku desteka eskerî û lojistîk ji dewleta Tirk û ‘Artêşa Hur’ digrin û di warê siyasî û diplomasî de jî pişta xwe bi muxalefeta Stenbolê xurt dikin, wê êrîşên xwe li dijî heremên Rojava berdewam bikin. Ew dixwazin van hereman bigrin dest xwe û çavkaniyên petrol û berhemên çandinyê ji destê Kurdan derxin. Lewma wê êrîşên xwe berdewam bikin.
Li bajarê Reqayê jî niha komkujî li dijî Kurdan pêk tên. Muxalefeta nijadperest qet devê xwe venake. Vê komkujiyê şermezar nake û hewl nade rê li ber bigre. Her wiha çalakiyên xwekujî yên terorîstan jî şermezar nekir. Ev muxalefet dixwaze ku ev komên çete pişta Kurdan bidin erdê û hêza Kurdan a eskerî qels bikin. Dixwaze heremên Rojava tevlihev bibin, ev çete Kurdan çavtirsandî bikin û wan neçarî rev û koçberiyê bikin. Bi vê yekê wê muxalefeta nijadperest karibe rê li pêşiya projeya Xweseriya Demokratîk bigre û destûrê nede ku Kurd li Sûriyeyê bibin fakorekî  vî şerê navxweyî yê qirêj.
Tê gotin ku DYA wê derbeyeke eskerî li dijî rejîma Beşar Esad pêk bîne. Hinek Kurd bi vê yekê kêfxweş dibin û hêviya têkçûna Esad û hatina muxalefeta nijadperest li ser textê desilatdariyê dikin. Dibêjin wê muxalefet ji rejîma Esad baştir be. Ev tesbîteke şaş e. Eger oprasyonek eskerî ya DYA’yê rejîma Esad birûxîne, dê muxalefet bê ser desthilatdariyê û zêdetir bi ser Kurdan ve were û hewl bide heremên wan kontrol bike. Yanî ew tiştê ku rejîma Esad ya qels niha nikare bike, wê muxalefet pêkbîne. Lê eger ev oprasyon tenê çend noqteyan hedef bigre û rejîmê qelstir bike, ev yek wê ji bo Kurdan baş be. Wê rejîm qels bibe, lê muxalefet bi sernekeve. Dê şerê wan berdewam bike û her 2 alî jî ber bi têkçûn û qelsbûnê ve biçin.
Divê em bizanibin ku rejîma Esad li gel hemû cinayetkariya xwe lê bi qasî komên çete yên girêdayî muxalefeta nijadperest Kurd nekuştî ye û bi ser Kurdan ve nehatiye. Muxalefeta nijadperest û ajan ji bo Kurdan ji rejîma Esad bi tahlûketir e. Kurd gerek li gorî vê rastiyê tevbigerin…