Çalakîya grevê vêşanî ya Nurîye Gulmene û Semîh Ozakçayî ke bi vatişê ‘ma karê xo tepîya wazenî’ daybî destpêkerdiş, roja xo ya 174. de dewam kena. Sey ke yeno zanayîş Gulmene û Semîh roja 76. ya çalakîya xo de ameybî tewqîfkerdiş û o wext ra nata zîndan de yî. Çalakgerê ke rewşa înan her ke şono hîna xirabêr bena, 14ê êlule de do bivejyî hakimî ver.
Buroyê Huqûqî yê Şarî ra Avûkate Ebru Tîmtîke qisey kerde û vera komîsyonê OHALî û nizdîbîyayîşan de reaksîyon nîşan daye.
Tîmtîke va ‘tena waştişêkê Nurîye û Semîhî esto, o zî agêrayîşê karê xo yo’ û wina dewam kerde: “Nika yeno vatiş ke komîsyon do erey cigêrayîş bikero. Wa herinda komîsyonî de sewbîna çî bierzî dewre. Yê ke heta ewro vatî ‘ma wazenî çareser bikerî’ tim komîsyonî nîşan dayî. Ma verê cû zî vatbî ke komîsyon goreyê huqûqî nîyo û çareserî zî nêano. Çareserkerdişê probleman bi nê komîsyonî nêbeno. Tena şertê qedênayîşê grevê vêşanîye yê çalakgeran bi agêrayîşê karî mumkin o. Xora Nurîye û Semîh dîyar kenî ke do çalakîya xo bidomnî. Ma zî do çalakîya xo bidomnî û ma do raşteyan de bibîy.”
Komîsyonê OHALî orte de çin o
Tîmtîke qiseykerdişê xo de sebebê muracatê komîsyonî kerdişî kerde û wina va: “Ma muracat kerd, labelê netîceyêk nêvejîya. Muracatî hetê sekreteran ra yenî qebulkerdiş. Herçiqas ke bi hawayo baş zanî ke na babete lezgîn a, reyna zî sey ke muracatan mîyanê 2 aşman de bigîrî, têgerenî. Orte de mehkemeyêk çin a. Komîsyonê OHALî nika orte de çin o. Aye rojan vatîy bînaya Serekwezîrîye de komîsyonêk esto, labelê ewja de kesê ke ma muxatap bigîrî, çinêbî. Ma wazenî waştişname bidî, labelê ma nêzanî ke bidî kura. Çimkî mekanîzmayêk çin a. Tîya de rayîrêkê huqûqî çin o.”
Ê do xoverdayîşê xo bidomnîy
Avûkate Tîmtîke qala nizdîbîyayîşê Mehkemeya Heqê Merdiman ya Ewropa (AÎHM) zî kerde û qiseykerdişê xo wina qedênaye: “Cok ra ti manaya vatişê AÎHMî yê ‘ma rayîrê huqûqo mîyanên akerd’ çin o. Komîsyonê OHALî zî nika bi hawayo fîzîkî nêxebetîyeno. Nurîye û Semîhî vizêrî eynî çîyî vatênê û ewro zî eynî çîyan vanî. Heta ke waştişê înan nêro ca û nêagêrî karê xo do xoverdayîşê xo bidomnî. Cok ra sewbîna ti weçînite çin o. Ê do xoverdayîşê xo bidomnîy.”
HABÎBE EREN / ANQARA