Serr 1987 bî. Beyntarê dewleta Îran û Iraqî de şerêk giran bi. Îran hetêk de, Iraq, Amerîka, Ewropa û Rusya û dewletê erebî hetêk de bî. Îran ser xo bi. La hema hema pêronê dinya destekê Iraqî kerdenê. Yew hetêk bîn zî bibi, eyê zî hetê Îran girewtê. Hetê ra zêdeyîr bibî tetîkkeş û çeteyê Îran. O zî KDP bî. Pêşmergeyê KDP kewtî vernîyê eskerê Îran, Iraqî ra şer kerdenê. Beno ke tayî vajenê raşt nîyo. La vîdeo zî esto. Uca de pêşmerge KDP eşkerê vanî “ma qey Îran şer kenî”. Vanî “ma eskerê Hûmênî înanî”. 

Dewleta Iraq û Saddamî, keye Barzanî û KDP sucdar kerdênê vatênê, “xayîntî kenî, hetê Îran gênî. “ Rewşa ke keye Barzanî û KDP mîyan de bî, o rewş kerdibi semed, hêrîşê Başurê Kurdistanê kerdênê.

Zaf plane komkiştişî amede kerdibî. Yew plan bi nameyê “Hereketa Enfal” raverberdênê. Bi nayî nameyê de serra 1987 de destpêkerd, bi seyan dewe kurd veşnayî û talan kerdî. Nêzdîyê 200 hezar kurd kiştî. Bi hezaran keyna û cinîyê kurd, esîr girewtî. Tayî înan berdî, rotî. Rotî Erebîstan û Misir înan. Nika DAÎŞ’ê dewleta tirk Şengal de çi ardo ser keyna û cinîyê kurd, eynî çîyê ucaxî Saddamî kerdî. Saddamî nê çîyê en zafî hetê Germîyan de kerdî bî. Hemberê nê çîyan keye Barzanî sekerd. Qet çik nêkerd. Pêronê keye Barzanî xora Îran de ciwîyenî. Çi amenê ser şarê kurdî, qet etîrê înan de nêbi.  Nika ser Komkiştişê Enfalî xo mazlum danê nîşandan û ser gunê şarê kurd xo dane ciwîyayîş. La ucaxî qet çîyêk nêkerdibi.

Zewbî zî dima ra ma zanê Rejîmê Saddamî, pê çekê kîmyevî Helebçe de komkiştiş viraşt. 5 hezar zêdeyîr tut, kal û pîrê şarê kurdî ameyê kiştiş. Erd û ezman bibi mij û dûmanê çekê kîmyevî. Ewro KDP ser Komkiştişê Helebçe zî propaganda kena û xo dana ciwîyayîş. La ucaxî Saddamî vatênê ver ku KDP, hetê Îran gêna û xayîntî kena, ez qey ayê hêrîşê Kurdistan kena. 

Saddam hina vatênê. Ma zî vaji “Saddam hina vano, berpirsyarê Komkiştişê Enfal û Helebçe, KDP’ya.”

Ma pê nê qiseyan qet Saddamî sey dîktaroke nêvînê û sey dagîrker û dişmen nêvînê. Ma ser çapemenî zî hina vila bikeri. Ma vaji “KDP bîya semedê Komkiştişê Enfal û Helepçe.” Raşt beno? Ney. Eger no rewş raşt nêbeno, KDP senî ser komkiştişên ke dewleta tirk û Erdogan kenî, PKK sucdar kena!

KDP û keye Barzanî senî şinê dewleta dagîrker û Erdogan pîroz kenî. No şermêk giran nîyo! Çiyo hinayîn neyartî nîya! Nika Kudistanê yew raştî esta. KDP û dewleta tirk-Erdogan bîyê yew û şerê şarê kurdî kenî. Neyartîya şarê kurdî kenî.