Endamanê Komîteya ‘Ocalan rê Azadî’ ya Başûrê Kurdistanî ra Fayîq Gulpîyî derheqê serrgêra Komploya Mîyanneteweyî ya 15ê Sibate de qisey kerd û destpêka qiseykerdişê xo de komplo şermizar kerd.
Gulpîyî dîyar kerd ke ‘Ocalan fîlozof û rayberê sîyasî yê şarê kurdî yo’ û wina dewam kerd: “Dişmenê kurdan vatênê qey eke Ocalanî esîr bigîrî do teslîm bibo û şorişo ke dabî destpêkerdiş zî do peynî bibo. Çimkî tarîx de heme serewedaritişê kurdan bi tasfîyekerdişê rayberan tasfîye bîbî. Labelê na reye wina nêbî. Çimkî Ocalan sey kurdê bînan nîyo. Kitabê xo yê ‘Pawitişê Şarêkî’ de vano; ‘Pêxemberî seba ke mesajê xo biresnî şarê xo, cayêk de kewenî înzîva, seba mi zî Hepisxaneyê Îmrali bî cayêko winasî.’ Rayber Apo Hepisxaneyê Îmrali sey cayê hetê felsefe û fikrî de cayê newe ra xelqbîyayîşî hesibneno.”
‘Hendayî reaksîyonî ma texmîn nîkerd’
Gulpîyî dewamê qiseykerdişê xo de vist vîrî ke ‘Tevgerê Apocî tena tevgerêk sîyasî û leşkerî nîyo, tevgerêk felsefîk û fikrî yo zî’ û wina dewam kerd: “Ocalanî kadroyanê xo bi felsefeya xo resneno. Heta ke Ocalan nêamebî tepiştiş, bi fikrê xo bi hezaran Ocalanî resnabî. Wexto ke esîr ame girewtiş, bi seyan merdiman xo veşna. Nêyî ver Wezîra Karê Teberî ya Amerîka Madelîne Albrîghte vatbî ‘ma texmîn nêkerdênê ke do hende reaksîyon bêro dayîş.’
Gulpîyî dîyar kerd ke ‘vernîya Yewîya Neteweyî ya Kurdan de xeylê sedemî ke benî asteng estî’ û wina va: “Her serrêka derbaz bena, têkoşîno ke seba çareserîya problemê kurd û azadîya Ocalanî yeno dayîş, gird beno. Ma zî planêk viraşto. Ma do hem komplo şermizar bikerî û hem zî seba azadîya Ocalanî bixebetyî. Ma do hem seba azadîya Ocalanî û hem zî seba ke problemê kurd bi perspektîfêk demokratîke çareser bibo, ma do têkoşînê xo bidomnî.”
REBAZ HESEN / ANF / SILÊMANÎ