2008 ra na het seweta naskerdena Tertelê Dersîm konferansî virajînê. Tabî virastena nî konferansan zaf mûhîm a.
1. Çike ma, yanê dersîmizî, bi tarîxê ameyme tê rî. Ma hata nî serranê peyenan tertelê xo qebul nêkerdenê. Ma ke qebul bikerdenê, herhal ma û piyê ma, ma ro nêdenê, nêvatenê ‘şerê mektebê tirkî de bi tirkî medeniyet bimusê.’ Ma dîna xelesnenê, hama hayrê xo nêbîme. Taye dersîmizî hona zî qirkerdena xo qebul nêkenê, na meselade bîn a.
Raştiya ma na biye.
Nî konferansan ma de xêle çî vurna. Konferansê virenan bi taybetiye çapemeniya Tirkiye de hurenayîsan rê raye kerde ra. Çiqas ke jê vatena ma nêbo, dewleta  tirkî namê mesela na pa. Negatîf ya zî pozîtîf, hurenayîsan tertele ard ra însanan vîrî.
Na rîwal ra sazî, dezge û mordemê ke nî konferansî kerdê amade, berxûdar bê, wesûwar bê. Ewro nêbo zî, meste her kes emegê înan vîneno, qiymet dano ci. Taye hona tesîrê na kar gureyî fanêkenê. Na zî raştiyade bîn a.
2. Nî koferansan teverê mara zî însanî hesnayî pê. Mordemê ke tirk ya zî kurd niyê. Xêle mordemê bêaxkî ameyî konferans, qesey kerd, nahure, fikrê xo vat, fikrê dersîmizan guret. Çiqas ke senik bo, çapemeniya sarê bîn zî nusna, xebere dê. Îlîmdarî, profesrorê ke ameyî konferans, eke şî caye, Tertelê Dersîmî sero zonayîsê xo kesê bînî de bare kerd. No hal zî seweta vilabiyayena mesela wertê homete de zaf zaf muhîm o. 
Hata na roze honde kara nî konferansan biye. Karode giran û rind bî.
Pekî naye ra tepiya se beno? Niya devam beno?
Îta de ma gune vinderîme û hebe bifikrîme. Hen bifikrîme ke, emegê ma tol nêvejiyo. Gamade bîne lazim a. Armanc û hedef gune zelel bê. Ez zonen, hevalê ke hata nika no kar kardo, naye ra tepiya zî gamanê bînan erzenê. Cayê xo de nêvindenê û karo rutîn nêwazenê.
Tertelê Dersîm gune mavênê netevan de bêro naskerdene. No kar zî zaf sebir û teqete wazeno.
Seweta na karî gune jû dezge bêro ronayene. Na jû komele niya. No dezge gune  mesela bero sazî û dezgeyanê mavênê netevan. Waxto ke gurenayîsode profesyonal nêbo, tertele mavênê netevande nêno zonayene û naskerdene. Dezge ke ame ronayene, gune karê lobî zî bikero. Zovîna karê ma zor o. Serkewtene mara dûrî manene.
Yê haskerdoxanê Dersîm serkewtene rê teqeta xo esta.