Hêzê Pawitişî yê Komelkî (HPC) ke Qetlîyamê Berx Botanî yê 25ê Hezîrana 2015î de virazîya ra dima ame awan kerdene, 3 serrî ra dima konferansê xo yê sifteyînî virazeno. 800 delegeyî beşdarê konferansî bîyî.
Hemserekê Meclîsê TEV-DEMî yê Kobanê Ehmed Şêxo, Hemsereka Konseyê Xopawitiş û Pawitişî Ehmed Şêx Hesene zî beşdarê konferansî bîyî. Konferans salona Newroze de yena viraştene û salone de pankartê ke ser o ‘Pawitişo meşrû sîyasetê ewleyîye yê komelê ehlaqî û polîtîkî yo’ û ‘Ganî cinîyî bi îrade û zanayîşî pawitişê xo bikerî’ ameyî aliqnayene.
Seba dîvanê konferansî 3ê ci cinîye pêro pîya 5 kesî ameyî weçînitene. Ehmed Şêx Hesene qiseykerdişê akerdişî kerde. Şêx Hesene va ‘şorişê ma ver bi serkewtişî şono’ û wina domnaye: “Ganî ma ewro û wexto ke Embaz Egîdî çalakîya sifteyîne tede viraştbî, muqayese bikerî. Ma gamê girdî eştî û ganî ma xerîtaya ke Ocalanî ma rê xêz kerda de bimeşyî. Bingeyê serkewtişî de xopawitiş esto.”
ANHA / KOBANÊ