Ti vana qey ez newe fam kena ke kurdî qey oxrê hendê galiman, hendê cengan, hendê zulm û zordarîyan çîn nêbîyê. Nêqedîyê. Koyî! Nê koyî wa û bira yê. Nê koyî dost ê. Nê koyî pawitox ê. Berz ê senî berz ê! Ti vana hama resay asmenî. Bi xemla mazêre hende rindek ê hende rindek ê ke mordem qemîş nêbeno ke nîyado. Ez newede hîs kena ke nê koyan de kes bi ma nêşkîno. Nê koyî pîşta kamî de bê pîşta înan nêna war.
Koyî aramî yê. Şima nêşkînê aramîya koyan cayêde bîn de bivînê. Aramîya koyan asmênê kewe, herra bi berekete, sedaya awa zelale, vayê honikî, bêvengîya efsunîye, astaranê şewe yê ke êdî tenê astareyî nîyê, can û royê ma yê, ra êna. No aheng bi cuya gerîlla ra beno ahengê gerdûnî. Ahengê gerdûnî yo ke destê serdestan ê qilêrin û qefçilî nêreştê ci. Ti şîkîna pêrarêk de, wa pêrare gêrîsê koyêde berzî de bo -xora koyê ma yê nizmî çİn ê- vindêrê, hermanê xo yakerê, çimanê xo bicêrê, goş bidêrê nê ahengî. Nê ahengî heta mezgê astikanê xo hîs bikerê. No aheng her vîste de xo dano hîs kerdene. Şima şîkînê no ahengo ke bajaran xerepnayo koyan de hîs bikerê. Şima şîkînê bicuyê!
Şik çîn o ke maneyê koyan bi lejê azadîye beno temam. Bi cengê azadîye beno temam.
Huyayîşê çimanê hevalan sey awa çeman herekyeno zerrîya şima. Pêro derd û kulê ke zerrîya şima de qiloz bîyê keno vila. Dano xo ver beno. Hard û asmenê zerrîya şima de heskerdîşî rê ca beno ya. Hard û asmenê zerrîya şima bi heskerdîşî benê pir. Kîşta heskerdîşê Şoreşê Rojawa û şarê Şengalî de heskerdîşê koyan û hevalan nemcetîye keno temam. Ti vana qey êdî ti heta bi heta estbê.
Ti bi virarkerdîşî wazena hesreta ke qey hezar serrî ya bivîyarnê. Çiman ra hesirê şênîye herekîyenê. Ti biwazê verê înan bicêrê kî înan serbestîya xo îlan kerda. Ti bi înan nêşkîna. Ê û huyayîş têdest der ê. Roşana zerrî ya. Zerrî govende der a.
Nê koyî koyê Qandîlî yê. Koyê Qandîlî yê ke Karasunguran serran verê amênê royê azadîyê êştbî ci ewro Vakur, Başûr, Rojhelat, Rojawa, Şengal û Vakurê Surîye de bîyo, beno laşe. Rojawa de bi şorêşê şaran ê rindekî bîyo tacîdar. Qandîl ewro no dem û dewrano gewr vurnayo, vurneno. Kerdo, keno reng bi reng. Vano dinyayade bîne esta. Vano ey mordemîye ma mahkumê na dinyaya serdestan, na dinyaya heramîyan, na dinyaya qefçilan, na dinyaya tecawuzkaran, na dinyaya kîştoxan nîyê. Vano û musneno. Qandîlî na dinyaya bîne awan kerda, awan keno.