Kravate fransizan Hirvatistan ra giroto. Wate kravat zî, hirvatî yo. Xo xemilnayîşê hirvatan fransa de bi yo kravate çîna burjuvazî. Yeno zanayîş ke çîna cor a ke serdest a, tim û tim xo komel-şar ra wazeno cîya bikero. Cîyayî mezg de dest pê keno, çina xo ra dayîş ra temam beno.
Camêrdê hirvatî yeno bikarardiş
Bi taybet dema netev-dewlet de kişt çîna burjuvazî çîna karmenda ke mîyanê pergala dewlet de guryeno, kewno raver. Komele fermî a ke mîyan pergala dewlet der o, bi çîna polîs û eskeran temam beno. Nînan xo komel ra birnenê. Xo ancenê cor, komel zî cêr de manena. Coka heme çîyê xo cîya kenê ke nînan asanî bêrê şinasnayîş. Xo xemilnayîşê camêrdê hirvatî yeno bikarardiş û Fransa de zey kravate vejîyeno. Wate newe geno.
Wexta împaratorîya Osmanîyan de tewr verê, padîşayê Osmanîyan Sultan Abdulmecîd kravate xo ra dano. Çunke seraya Osmanîyan wazenê zey burjuvazîya Ewropa bicuyê. Tepiya kravate Tirkîya û Kurdistan de yeno bikarardiş. Wexta ke komara Tirkîya ame ronayîş, hetê fikrî de Ewropa ra zaf bandur bena. Coka ebi destê dewlete çîna burjuvazî raver kewno. Fikrê laîkî fina sifteyîn kewno mîyan pergale dewlet. Anegore na zî çina xo ra dayîş de xeylê çî vuryeno. Kinc û kisvet hewna wexta ke wendekar şono wendegeh, vuryeno.
Qeçekê şaran genê perwerde kenê
Wendekar o wext de museno fermîyata dewlet. Museno kinc û kisvet xo ra bi do. Museno kravat vile xo ra girê bido û vera ser pîzeyê xo bido. Wexta ke wendin temam beno, wendekar hadre yo zîhnîyet, fermîyet û çina dewlet cûya xo de bikar biyaro.
Tay bûrokrat winî musenê ke bê kravat nêşenê bi cûyê. Kravat zey endamê laşê xo vînenê. Ma vajê burjuvazî, ma vajê komela fermî ya dewlet; qeçekê şaran genê perwerde kenê. Zîhnîyet û cûya xo musnenê nînan. Êdî winî beno ke qeçek; ma û pîyê xo ra şerm keno. Heme dîrok, çand û cûya xo vîra keno. Ebi qatlix û kravat beno payayê dewlet.
Şar ma zî ewnayîşa xo na mijare ra est o. Taybet zî ê ke dewlet û komela fermî a dewlet nêşinasnenê, nêkewtî mîyan. Burjuvazî senî komel ma werdî vîneno, komel ma zî nînan pesend nêkeno. Zîhnîyet, cûyayîş û çinayê nînan ra dûrî vindeno. Qasî ke yeno vîra mi, der û dorê ma de kravat ra vanê; hevsarê heri û lexe pê kenê. Şar fermîyet, rîtûel û serenomi dewlet nêşinasnenê. Coka çiyê ke çîna cor keno û xo ra dano ra dûrî vindeno.
Mezg di senî bo se winî zî cûyeno
Şar; şahî, fîraz kerden, seyran ra hes kena. Biyayîşê merdimî komelîyo. Bê komelî bîyayîş nêbeno. Coka çîna cor der o, komelî nîya. Şar xozayî yo û komelî yo. Ebi xoza xo cuyeno. Çîna sermayedar wina nîya. Zerre û teverê xo sey jûbîn nîyo. Ebi kravat wazeno xo zey efendî, beyefendî, centîlmen bi mojno dormeyê xo. Labelê wina zî nîya. Komel zerre di, mezg di senî bo se winî zî cuyeno. Ne bi qanûn, bi axlak cuyeno.