Universîteyê Kadîr Hasî her serre aşma kanûne de bin nameyê ‘Cigêrayîşê Sîyasal û Komelkî’ de netîceyê cigêrayîşanê xo yê serrêkî şarî par keno. Netîceyê serra 2016î amey parekerdiş.
Goreyê netîceyê cigêrayîşî, se ra 71.7ê komelî de kesî vanî krîzê ekonomîk Tirkîya de esto. Reyna goreyê netîceyê cigêrayîşê serra 2016, Tirkîya de sera 32,5ê kesan Sîstemê Serekî nêwazenî. Netîceyê ke ameyî parekerdiş, wina yî; sera 71.7ê komelî vanê ke krîzê ekonomîk esto û sera 55.7ê komelî zî hetê ekonomî ra rewşa înan baş nîya. Labelê hetêko bîn ra zî sera 38,7ê komelî zî polîtîkayê hukmatî ra memnun î û polîtîkayan bi hawayo serkewte vînenî. Goreyê netîceyan weçînitoxê AKPyî ra sera 10,5; weçînitoxê CHPyî ra 68,7; weçînitoxê MHPyî ra 43,6 û weçînitoxê HDPyî ra zî 80,3 polîtîkayê ekonomi yê hukmatî xirabin vînenî.
Bawerî nêmenda
Heto bîn ra Tirkîya de sera 59.8ê komelî zî dergbîyayîşê rewşa OHALî nêwazenî. Par bawerîya şarî artêşa Tirkîya rê sera 62,4 bî, labelê her ke şî bawerîya şarî artêş rê kêmî bîye û kewte 47,4. Serra 2011 ra nata seba Tirkîya welatê tewr tehlukeyin Îsraîl ameyêne dîyayîş, labelê na rewşe bedilîyaye û Federasyonê Rûsya bi nîsbetê 64,7 seba Tirkîya tehlukeyin ameye weçînayîş. Emser reyna bi nîsbetê 73,3 Îsraîl welatê tehlukeyin ame dîyayîş.
STENBOL