Vizêr no kubbeyî de roşan estbi. Seatê şewdirî ra şêlig bi wesayîtan şi cayê roşanî. Şêligî dest bi fîraz kerdişê roşanî kerd. Seke Girêreş (göbeklî tepe) yê Rihayî de cayê her klanî cîyayo, tiya zî cayê her eşîretî cîyayo. Raşto şêlig yeno pêser û pîya roşanî fîraz keno la her eşîret seba xeyrî xo rê yew xeyme (kon) roneno û meymanan pêşwazî keno.
YBŞ û YJŞ zî tewrê merasîm bî
Roşanê verê terteleyî/komkiştene de neqra (davul) û zirne zî cenayêne. Bi taybet gencan, la heme şêlig pîya govend girewtêne. Govend girewtiş heta vereşan dewam kerdêne. Labelê, çi heyf, terteleyî ra dima êdî neqra û zirne nêyenê cenayene. Şêlig şina kubbeyî mîyan û şêxê înan înan rê duayî kenê. Şêlig bi warway şina kubbeyî mîyan û wexta kewenê zereyê kubbeyî, şêmûge de kêverî maç kenê û vîyarenê zerre.
Partiyê sîyasî, hêzê leşkerî zî ameyêne û roşan fîraz kerdêne. Bi taybet azayanê YBŞ (Yekîneyên Berxwedana Şingal) YJŞ (Yekîneyên Jinên Şingal) bal antêne xo ser. Seba YBŞ-YJŞ Şingal û nê cayê fîraz pawit û nêverda DAÎŞ dagîr bikero. Êyê ke nê cayanê fîraz pawenê fina YBŞ û YJŞ yê. No cayî de şêlig şîye goristanî (mezeleyî) ser û gorên merdeyê xo zî zîyaret kerd. Badê cû şêlig vereşan ra şîyêne keyeyanê xo.
AZAD ARARAT / ŞINGAL