Nûmayişê ‘Mayanê Haştî’ ke sifte serra 1996 de destpa kerd, heta roja ewroyî bêmavên ramenê. Dayikê ke zerreyê yew serr de xo vera pêrokîn hêrişan kerdî sîper, la nêşayî cenazeyanê domananê xo bigîrê raya haştî ra nêbirnîyenê. ‘Mayanê Haştî’ herzewbîn bi ‘Mayanê Şeme yê ke her hefte roja Şeme de doman û merdeyê xo geyrenê ra tekoşîneke wertex day ramitiş. Seba ke şer vindero her rojanê Çarşeme Stenbol de ver Qesra Dolmabahçe de bi nûmayişa roniştişî vistî vîr ke haştî mumkin o.
Dayikê Haştî ke pêro heremanê operasyonî de bî mertalê ganî, zerreyê xoverdayişê dûştê qaleqol û qereqolan de ca girotî. Taxê ke qedexe ame îlankerdiş de, rexmê pêrokîn hêrişan bi şarî ra pîya xover day û taxanê xo terk nîkerdî. Hêriş û qetlîama Cizîr bi nûmayişê grevê veyşanî qirêşnay rojdema dinyayî.
Dayika 80 serrî amê binçim girewtiş
Dayikê Haştî ke bi xoverdayişî cewab day pêrokîn hêrişan, rîwalê nûmayişanê demokratîk mudaxaleyanê giran ra rî bi rî mendî. Dayikê Haştî Dilşa Ozgen a 80 serrî rîwalo ke cayê mezeleyê 2 domananê xo de konteynireke viraşta, 13ê Tebaxe de amê binçim girewtiş. Û netîceyê nêrazîbîyayişanê dezgehanê cenîyan de serbest veradîya.
1ê Îlonê ‘Roja Haştî yê Dinya de şî Meclîsî û bi parlementeranê HDP, CHP û AKP pêdiyayiş viraştî venga verpersîyarî day. Dayikê Haştî wextê şîyayişê Meclîsî de raştê cigeyrayişê viranî amey. Dayikê Haştî seba wedarnayişê tecrîdê ser Rayverê Şarê Kurd Abdullah Ocalanî û serbestîya ci Taksîm û xêlê cayan de nûmayişî viraştî.
Destûrê girotişê cenazeyan nêday
Verfeka ‘Mayanê Haştî’ yê Amedî Havva Kiran vist vîrî ke tîvarîya kesî keyeyê xo de çîna, her ca bîyo qereqol. Kiran dîyar kerd ke demê xoverdayişê xorayirberdişî de dejê girdî amey antiş û va, ‘destûr nêame dayen ke dayik cenazeyanê domananê xo bigîrê.’ Kiran hayr ant hêrişanê AKP ser û dibare ard ziwan ke Sûr, Cizîr, Nisêbîn, Gever de qetlîamê wehşîyane viraştî. Cenaze bi hefteyan kuçeyan de mendî. Doman mecbûr kerdî ke pencereyan ra temaşeyê cenazeyê mayanê xo bikerê.
Vengdayişê haştî bêcewab mendî
Verfeka ‘Mayanê Haştî’ Havva Kiran vist vîrî ke seba vindernayişê gonî ê şî Enqere û bi partîyanê sîyasî ra pêdiyayiş viraştî û da zonayen ke enê hewldayenê înan bê cewab mendîye. Kiran da zonayen ke rexmê hendayî hêriş û dejan zî ê haştî de israr kenê û va roj roja yewitî ya.
Kiran waştena dewamkerdişê muzakereyan ard ziwan û wina va: „Wa bi rayverê ma ra pêdiyayin virazê û mase newede ra ronê. Wa şer (lej) biqedîyo. Wa domanê Kurdan zî, yê Tirkan zî nêmirê. Seba ke bibê padîşah wa kiştişî ra fek veradê.“ Kiran hayr ant rehîn girotişê wekîlanê HDP ser zî û bi nê vatişan AKP aya kerd: „Zey Dayikê Haştî ma vanê ke destê xo şaredarî, erja û gonîya domananê ma ra biance. Zereyê qesrî ra ti wext nêşkenê domananê Kurdan biqedînê. Zey Dayikê Haştî heta ke na zilm biqedîyo û haştî bîro ma dê tekoşîna xo biramnê.
DÎHABER / AMED