AKP şoreşo henen kerd ke qe mevazê!! Şoreş bî, çiyêke ma xeyal nêkerdenê bî, kurdî restî heqanê xo, alevî restî heqanê xo!!! Ma endî çi biwajîme!

Serokwezîrê tirkî, Recep Tayyîp Erdogan 45 deqeyî marê kerd eskera, o ça demokrasî nêwazeno. Çond reye Ataturkê xo yo qetilkar goyna. Niya kemalîstiya AKP reyna marê kerde zelal. Avê nêşiyayene demokrasî de muxalefet sucdar kerd. Kilmek vat, AKP 11 serrî yo xêle çiyê rindî kerdê, la muxalefet her tim verva ci vejiyo.
Aleviyan ra vat “ewro şerê meste bêrê, heq comerd o!” Namê unîversîta Nevşehîr kerd Haci Bektaşî Velî û niya mesela aleviyan halkerde. Tabî aye ra avê Estemol de namê pirdî Yavuz Sultan Selîm nayî bî pa. Recep Tayyîp Erdogan na qetilkarî paweno vano “cedê ma wo.” Ataturk alevî qirkerdî cirê wayîr vejîno, Yavuz Sultan Selîm Alevî qirkerdî, cirê wayîr vejîno. Aleviyan de niya niyadano.
Seweta kurdan zî na pakete ra onca tewa nêvejiya. Zonê mayan de perverde, serbest raverdayena siyasetvananê kurdî, wedardayena bendê weçînîtîşî na pakete de ca nêguret. Mêrik pê kurdan kaykeno. Halkerdena meselan ra qesey keno, la vano diseme ra hata yewseme nêşîkîme halbikerîme, ora dime ala niyadîme. Endî bî zelal ke seweta hukumatê AKP mesela kurdî çîna.
Seweta mi mesela AKP niya, ma de mesela esta. Her tim vame ma hukumatî ra, dewlete ra tewa nêwazeme, ebi xo ceme. Hama raştiye de na dewleta gonewere ra çiye pîme. Ala reye halê zonê xo û xo de niyadîme. Sazî û dezgê ma yê çapemeniye biyê merkezê otoasîmîlasyonî. Zonê ma tede jê teberikî osenê. Hen gureyeme û nusneme ke, sawoke hometa tirkî çê xo de nîşta ro televîzyonanê ma de niyadana, rojnamana ma wanena.
Ko de, deste de, dewe de, suke de, qeza û ware de eskerakerdîşî ebi tirkî yenê dayene. Tabî ma ke niya kerd, zonê ma zî avê nêsonê. Siyasetvanê ma zonê xora remenê, nustoxê ma bi zonê xo berhem nêdanê, roşberê ma bi zonê xo nêfikirînê, seweta domonanê ma bi zonanê ma tewa çîno. Halê ma ke niya bî, hukumat ça gaman bierzo ke!
Her çî ra avê ma bi xo gune gaman bierjîme, zonê xo her ca de biyarîme kar. Hem sazî û dezgeyanê xo de, hem zî yê dewleta terorîste de. Zovîna kes tewa ma nêdano û cîddî nêceno, çike vîneno ke ma kulturê xora dûrîme.