Tayî vateyê tirkan yê nîjadperêst estî. Yew vateyî xo de vanî, “Yew tirk bedêlê dinya yo”. Yew vateyê bîn zî hina yo: “Homa yew o, artêşê eyê tirk o.”
Raştîya nê vateyan çin o. Vateyê yewin de seba ke mîlete tirkî sey egîd û wayîrê cesaret nîşanbidênê hina pesnê tirkbîyayîş danî. Vateyê dîyin de zî hem Homa hem zî dînê Îslam qey nîjadperêstîya tirkî bidênê şuxulnayîş, qirkerdiş û talanê xo rewa bikerenê vanî. Wexto ke yew biewnê tarîxe tirkan, kam hebî şer de tirkî serkewtî, o serkewtiş de esas ayo ke rol kaykerdo kurdî yê.
Şerê Melezgirt, Çildêran, Mergê Dabik, Rîdanîyê, Xaçperesten de na raştî dîyar a. Tirk qalê kam hebî egîdî û şerkewtişê kênî, uca de bi yeqînî kurdan egîdî û serkewtiş viraşta. Tirkan ser egîdî û cesaretê kurdan tarîx de ca girewto. Bîyê wayîrê welat, bîyê mîlet. La tim û tim hemberê kurdan xayîntî kerdê. Serkewtiş dima ra ser kurdan qirkerdiş kerdê.
Kurdî bi temamî eleqeyê xo tirkan ra bibirnê, tirkî senî tewre fisonî hol vejîyeno werti. Ciwanê Kurdî gera na raştî bizanê û nêşerê leşkerîya tirkan nêkerê. Wa herkes biewnê xoverdayîşê Amed-Sûr, Cizîra Botan, Farqîn, Nisêbîn û Şirnex na raştî hîna zelal yena dîyayîş. Artêşa tirkî û çetê Sarayê Erdoganî, bi des hezaran esker, bi tanq û topan, bi teyarê û helîkopteran şinî ser Nisêbîn û Şirnexî, reyna nêşkenî se ciwanê kurdî.
Her roj vanî “hawar ey hawar!” Vanî, reyna Nisêbîn! Reyna Şirnex! Reyna şehîd! Serokê artêşê tirkî Hûlûsî Akar, 4 rey o şino Nisêbîn û Şirnex. Nê şîyayîşê Hûlûsî Akarî binkewtişê înan nîşandano. Reyna nêşermeyeno vano, “Teror do biqedîyo.” Ma ewnênî kam hina vato o qedîya yo. Dawudoglu zî hina vatibi. Se bi aseno. Çend serokwezîr, serokkomar û serokê artêşê tirkan hina va, sey înan nêvejîya. Qiseyê înan mendî, la ayê qedîyayî. Wa eyê xo bixapînenî. La şîîre ma raştîya înan hîna weş nîşandano.
Ey neyar!
Ti efendî, ez kole
Ti Homa, ez qul
Ti biaqil, ez bêaqil
Ti bitext, ez bêbext
Nîya nîya, ey neyar!
Bi ewnê Amed-Sûr
Bi ewnê Cizîre Botan
Bi ewnê Nisêbîn
Bi ewnê Şirnex
Ey neyar! Ey neyar!
Ti serdar, ez esker
Ti gul, ez teli
Ti şîrin, ez tal
Ti çakuç, ez asin
Nîya nîya, ey neyar!
Bi ewnê Amed-Sûr
Bi ewnê Cizîre Botan
Bi ewnê Nisêbîn
Bi ewnê Şirnex
Ey neyar! Ey neyar!
Ti sefakêş, ez cefakêş
Ti biwayîr, ez sêwir
Ti egîd, ez tersonek
Ti şêr, ez mêşna
Nîya nîya ey neyar!
Bi ewnê Amed-Sûr
Bi ewnê Cizîre Botan
Bi ewnê Nisêbîn
Bi ewnê Şirnex
Ey neyar! Ey neyar!
Ti se hezar bî.
Ez se kes bî.
Ti bi tanq û topan bî
Ez tena bi qeleş bî.
Besê to kena, ey neyar!
Bi ewnê Amed-Sûr
Bi ewnê Cizîre Botan
Bi ewnê Nisêbîn
Bi ewnê Şirnex
Ey neyar! Ey neyar!