Hantekîn hayr ant terteleyanê verên ser û niya va: “Dewleta hîlebaz, 38î de Dersim de sarê ma yê Qizilbaş qir kerd, ruşna sirgûn, înkar û asîmîle kerd, bê îtiqat terna. Polîtîkayê qirkerdin yê Enqera ewro kî vera Kurdan ramenê. Ewro kî bi ferrmanê Reîscûmhûrê Tirkiye Erdogan’î Kurdistan de, domanî, dayikî, gencî yenê kisten. Cesedê domanan, sivîlan erdî de manenê. No kî jew Kerbela yo, zilmekê girso. Zey ke tertelê Dersim de, dayikî, domanî kistî û eştî çemê Mûnzûr, zerrê pîzeyê maya xo de singû kerdî, ewro kî bi destê AKP, Erdogan’î, Sûr de, Cizîra Botan de, domanê kirmancû, bi tanq û topan qir kenê. 


Raya rayberanê xo de some

Şenol Hantekîn ard zon ke, kam ke domanan kişeno, o zalim o, kiştox o û aşkere kerd ke kam ke xo ra vano ez însana gune verniya na zorvajî de vengê xo berz bikero. Hantekîn vist vîkî ke, eke alewî ewro vengê xo mevecerê, meşt îye de kî zilmê Enqera bivînê û qiseyê xo niya ramit: “Jê raya heqîqate, serê xo berz bikerime. Kerbela de, Huseyîn’î sekerd ey bikerime. Zey Alewiyê Qizilbaş’î raya rayberanê xo de, raya Sey Riza de, Pîr Sûltanî de some. Hantekîn’î diyar kerd ke, kotî ke zalim û zilim esto alewî gerek sereyê xo wedarê. Senî ke Kobanê de sarê kirmancû serva xoserî da xover û dismenê xo vilakerd, gune bi o rihî Sûr û Cizîr de xover bidime. 


Gune nûmayişî dewam bikerê

Temsîlkarê FEDA Şenol Hantekîn’î hayr ant nûmayişanê protestoyî yê alewiyan ser û aşkere kerd ke, vera êrişanê dewleta Tirk hewldayen û hamle yê sazgehanê alewiyan rind bî û niya va: “Gune nûmayişê alewiyan dewam bikerê. Tarix ra heta nat, na dewlet serva alewiyan ne biya Komar, ne kî biya demokrat. Tim û tim, polîtîkayê hîlebazî û komployî ramit. Nika kî dewlet alewiyan ra wazena ke, dawa ya Kurdan ra dûr vinderê. Dewlet alewiyan ra wazena ke, ya leyê dewlet de ca bigîrê, ya kî qebûl nêkena. Hantekîn’î vist vîrî ke, alewî çiqe yenê jûbîn het, dewlet polîtîkayanê xo yê qilêrîn vistnena dewre. 


Alewî 90 serrî yo qir benê 

Ser persa projeyê ‘mektebê îrfan’ û vatişanê dîyanet de Şenol Haltekîn’î niya qisey kerd: Senî ke, dewleta Tirk 90 serrî yo alewiyan qetil kerd, ewro kî nê polîtîkayî bi destê AKP ramenê. Ewro kî bin nameyê projeyê ‘mektebê îrfan’î hewl dana alewiyan biqapîno û bikero mezhebê dewleta îslam. Haltekîn’î vist vîrî ke, alewî qe nêbenê ‘alewiyê dewleta Tirk’ û niya dewam kerd: “Ma zilmê sima, qetlîamê sima, Dersim ra, Mereş ra, Çorûm ra, Sêwas ra naskeme. Ewro kî no zilmê sima rameno. La endî ma no zilmê sima, qetlîam û zorvajiya sima qebûl nêkeme. Çê (keye) ma, raya ma, cayê ma leyê mazlûman o. Dewlet jû hetî ra hewl dana îradeyê  sarî Sûr de, Cizîra Botan bişikîno, heta bhin ra, agêrena alewiyan rê vana, ‘sima rê mektebê îrfanî’. Nê pêrokînî polîtîkayê xapînayişê.

Temsîlkarê FEDA Şenol Hantekîn’î hayr ant polîtîkayanê letekerdin û fetwayanê sazgehanê dewleta Tirk ser û ard zon ke, dewlet nêwazena ke, alewî leyê tekoşînê serbestiyê Kurdan de, leyê PKK de ca bigîrê. Hantekîn’î diyar kerd ke, alewî çiqe dewlet ra dûr vinderê, sarê kirmancû het de ca bigîrê, hondeke waştena demokrasî û azadî kenê berz û niya va: “Dewlet alewiyan serva xo taloke vînena. Dewlet tarix ra heta na het, derheqê alewiyan de zaf fetwayî day. Vatî ‘ne dînê alewiyan esto ne îmanê ci’, ‘na mîlet yê dewleta ma niya’, ‘nê komunîstê, qizilbaşê, ‘îtiqatê nîno çîno’. Na dewlet tim û tim dismenê alewiyan bî.  


Raya ma ‘Raya Heq’î ya

Hantekîn’î aşkere kerd ke, fikrê qizilbaşan sofreyê dewlet de, zey ‘raya sûra’ û niya va: “Fikrê alewiyan aşkere yo, raya xo bimbarek a, aşitî, demokrasî, azadî, weşî ya û na raya xo de israr kenê. Hometa alewî vanê raya ma ‘Raya Heq’î ya. Kes nîşkeno ebi qûral û qaîde alewiyan na rayî ra vejero.  Şenol Hantekîn’î vist vîrî ke, 90 serrî yo dewlet hewl dana derheqê îtiqatê alewiyan de bi xo qeraran bido. Vanê cayê sima Cem niyo û niya veng da alewiyan: Gune sarê ma yê alewî qûwetê xo girs bikerê, bêrê lê jûvîn, vengê xo xort berz bikerê. Dewleta zilimkar qûwetbiyîn ra tersena. Nayî ra ma, çiqe vengê xo rind vejerime, hendayî wayrê heqê xo, îtiqatê xo, cemê xo vejîme. 


FATMA ASLAN