Pawitoxanê Rayverê Şarê Kurd Ocalanî ra Cengîz Çîçek û Rezan Sarica ke vizêr şî Mûdanya nêşîyay bi kesî ra pêdiyayin virazê. Pawitox Çîçekî da zonayen ke rixmê pêrokîn hewldayenan nêşîyay bi îdarekaranê girotxane ra pêdiyayin virazê. Çîçekî da zonayen ke Sazgeha Midûrîyeta Girotxane esta la mûxetab çinîyo. Pawitox Rezan Sarica zî vist vîrî ke ne OHAL ne kî qerarê nêviraştişê pêdiyayin meşrû nîyo û sûcê hiqûqî yo.
Şar êşkeno tecrîdî bişikno
Parlementer Îdrîs Balûken ke derheqê tecrîdî de ANF rê qisey kerd, da zonayen ke beno ke hikûmet bi ramitişê tecrîdî planê kaosî kerdo hadre û îqazê ‘ganî mesaj û nêrazîbîyenê şarî yê derheqê tecrîdî de raşt bîrê fehmkerden. Balûkenî dûştê tecrîdî bêvengîya Awrûpa rexne kerd û da zonayen ke na bêvengî çarçoveyê hesabanê sîyasî de bena. Balûkenî da zonayen ke tecrîdo keyfî û xedar ke hetê AKP ame ferzkerdiş bi xoverdayişê Ocalanî û tezanê ciyê çareserî veng ame vetiş. Balûkenî aşkere kerd ke hina ayseno ke bi tecrîdê nikayî wexto ke Rojhelata Mîyanî de çareseserî xo frez keno de reyna wazîyeno tayî planê emperyal pratîze bikerê. Parlementer Balûkenî vist vîrî ke ganî kes dewlet û hikûmet ra teba nêpawo û aşkere kerd ke şar û çormeyê demokratîk bi hemleyanê sîyasî êşkenê tecrîdî bişikînê.
CPT rê vengdayişê Ocalanî
Temsîlkar û Desteya Rayverîn yê HDK zî derheqê weşî û tîvarîya Ocalanî de veng da CPT ke wezîfe û rolê xo kay bikero. HDK bi aşkerakerdisa nuşteyî veng da Komîteyê Verîgirotişê Îşkence yê Konseyê Awrûpa ke serva roşnîkerdişê raya pêroyîn wezîfeyê xo bîyaro ca. HDK waşt ke tecrîdo ke ser Ocalan yeno ramiten wedarîyo û serva ke manîkerdişê ver pêdiyayinan wedarîyê Wezareta Edalet û Hikûmet îqaz kerd.
Kordînasyonê Komalên Jinên Kurdistan (KJK) zî damûstayîna ke bi wesîleyê Roşanê Gule de weşîna de hayr ant tecrîdê Îmrali ser. KJK dûştê tecrîdî vengê berzkerdişê tekoşîn da û va: “Tekoşîna tewr gird yê xopawiten şikitişê sîstemê îşkence, şantaş û tehdîdî yê Îmrali yo.
Dersim ra mektûva ‘Ocalan’
Derheqê tecrîd de jû îqaz û nêrazîbîyen zî Dersim ra amê. Sazgeh û rêxistinanê sûk Rêxistina Efû ya Mavên netewî, CPT û Wezareta Edaletî rê dûştê tecrîdê ser Ocalanî mektûv rûsna û îqazê bi tecrîd xorînbîyayenê herbî kerd.
Rêxistinanê sûk yê DBP, HDP, KJA, MEYA-DER û xêlê temsîlkaranê sazgehanê civaka sivîl Kuçeyê Senat ra heta bana PTT ray şî û damûstayîn day. Damûstayîna ke hedê Hemseroka DBP yê sûk Hulya Yer amê dayen de vajîya ke tecrîdo ke şexs dê Ocalanî de yeno ramiten dûştê pêrokîn şarê kurd û pêrokîn şaran o. Yer vist vîrî ke ramitişê tecrîdî do herbî hona jêde xorîn bikero û waştena wedarnayisê tecrîdî kerd. Badê damûstayîn temsîlkarê pêrokîn sazgeh û rêxistinan bana PTT ra mektûvê xo rûsnay sazgehanê eleqedar.
Serva haştî Ocalan
Riha de zî nobeta azadî ya serva Ocalanî destpa kerd ramena. Cenîyê Rihayijî ke amey têlewe waştî ke serva haştî Ocalan serbest veradîyo. Nûmayişê nobed ke Riha û qezayanê ci Pirsûs, Wêranşar, Sêwereg, Xelfetî û Hewag de destpa kerdî roja 8. de ramenê. Parlementera Riha Dîlek Ocalan ke tewrê nobeda ke qezaya Navendê Riha Eyyûbîye de ramena bî hayr ant tecrîdê Îmrali ser. Ocalan waşt ke desinde tecrîd wedarîyo û raya pêdiyayînan bîro akerden.
‘Nobeda Azadî’ yê Amed zî ramena. Parlementerê HDP Îdrîs Balûken ke tewrê nûmayiş bi heta şikitişê tecrîdî veng da şarî ke tewrê nobed û nûmayişan bibo.
Stenbol de zî 10 sazgehan damûstayîn day çapemenî û waştî ke desinde tecrîd wedarîyo û muzakereyî reyna destpa bikerê. Verra tecrîdê Îmrali Serokanê Baroyanê hereman zî nêrazîbîyen damûsna. Serokê Baroyanê Wan, Êlih û Şirnexî vistî vîrî ke babeda Ocalanî zaf hessas a û îqazê ‘îxmalkerdişê na babedî do him hetê sîyasî, him kî hetê hiqûqî meseleyanê girdî akero’ kerdî.
NAVENDÊ XEBERAN