Avûkatê Rayberê Şarê Kurdî Abdullah Ocalanî Mazlum Dînç û parlamentere Pero Dundare derheqê tecrîdî de qisey kerdî û reaksîyon nîşan dayî. Parlamentere Dundare va ‘AKP aştîye ra tersa, cok ra şarî mijul kerd û bi no hawa bihêz bi’ û wina domnaye: “Kurdî tena wedarîyayîşê tecrîdî nê, eynî wext de azadîya Ocalanî zî wazenî.” Tecrîdo girankerde ke Rayberê Şarê Kurdî Abdullah Ocalanî ser o esto, dewam keno. Ocalan 27ê Temmuza 2011î ra nata bi avûkatanê xo, 11ê Êlula 2016î ra nata zî nêşêno keyeyê xo reyde pêvînayîş bikero. Nizdîyê 2 serrî yo ke ti xebere tira nîna girewtiş. Muracatê avûkat û keyeyê ci bi mehneyanê ‘OHAL esto, rewşa hewayî baş nîya, keştîye xirabe ya û sewbîna’ yeno qedexe kerdene. Babete ser o avûkatê Ocalanî Mazlum Dînç û Parlamentera HDPyî ya Mêrdînî Pero Dundare qisey kerdî û vera tecrîdî de reaksîyon nîşan dayî. Avûkat Dînçî va ‘7 serrî yo ke avûkatî nêşênî şêrî Girawa Îmrali’ û wina domna: “Herçiqas ke OHAL wedarîya zî tecrîd hîna dewam keno. Bi serran o ke ma seba wedarnayîşê tecrîdî têkoşîn danî. Labelê heta nika ma netîceyêko baş nêgirewto. Heqê mektûbe û telefonî zî bi serran o yenî asteng kerdene.” Dînçî da zanayene ke înan bi hawayo aşmane hertim raporî erşawitî AÎHM û CPTyî rê, labelê heta nika no het de teşebusêk nêameyo kerdene û wina va: “Nê dezgeyî zî goreyê dengeyanê mîyanneteweyî hereket kenî û cîddî kar nêkenî. Cok ra mîsyonê xo bica nêanî. Ewropa û dinya de ti nimuneya nê tecrîdî çin o. 20ê Temmuze de senî ke OHAL îlan bi, dima ra qerarê sifteyîne derheqê Îmrali de ame girewtene û pêvînayîşî ameyî qedexe kerdene. Tecrîd bi OHALî dest pênêkerd û ma bawer kenî ke do bi OHALî zî nêbedilîyo. Vera tecrîdî de têkoşînê ma do bidomîyo.” AKP tersa, şarî mijul kerd Pero Dundare zî va ‘îqtîdar aştîye ra terseno û xora no semed ra pêvînayîşê Îmrali bi temamî ameyî vindarnayene’ û wina dewam kerde: “Wextê pêvînayîşan de çim û goşê şaranê Tirkîya Îmrali de bî. Yê ke bawerîya xo aştîye ardbî, pêvînayîşanê Îmrali esas girewtêne. Îqtîdar aştîye ra tersa. Îqtîdarî şarî mijul kerd û bi no hawa hêz bi. Kurdî tena wedarîyayîşê tecrîdî nêwazenî, eynî wext de azadîya Ocalanî zî wazenî. Şerê Rojhelatê Mîyanênî tecrîdî reyde eleqeder o. Raştîya xo de Tirkîya serranê 90î ra nata tecrîdî reyde yena îdare kerdene.” Zîndanan sey cayê terbîyekerdişî vînenî Dundare qiseykerdişê xo wina domnaye: “Prosesê çareserîye de waştişo sifteyîne yê Ocalanî veradîyayîşê hepsîyanê nêweşan bi. Prosesê çareserîye bi nê şertî dest pêkerdbi. Heta ewro xeylê hepsîyê nêweşî zîndanan de merdî. Ê zîndanan sey cayê terbîyekerdişî vînenî. Ti cayê dinya de çîyêko winasî çin o. Seba wedarîyayîşê tecrîdî ma do heta peynî têkoşîn bidî. 3 serrî yo ke Îmrali ra ti xebere nîna girewtene. Îqtîdarê AKP û MHPyî wazenî hepsîyanê edlîyan bi qanûnê poşmanîye vejî teber û sîstemê xo çeteyan ser o bidî domnayene. Ganî vera nînan de hesasîyet û rêxistinîyêka girde bibo. Ganî ti kes vera tecrîdî de bêveng nêmano. Tena kurdî nê ganî heme şarê Tirkîya vera tecrîdî de veng bivejî.”  MERKEZÊ XEBERAN