Vera xespkerdişê qayûman de her hetê dinya ra reaksîyonî bênî zêde. Bitaybetî Vakurê Kurdîstan û Ewropa de çalakîyê protestoyî yenî viraştene û şar vera îqtîdarê AKPyî de bihêrs o. Na çarçewa de welatanê Almanya û Fransa de zî şar payan ser o yo.
Almanya de kurdîstanijî û dostê înan bi rojan o meydanan de yê. Bi desan bajaran de vizêr reyna çalakîyê protestokerdişî yê xespkerdişê îradeya şarî ameyî viraştene. Çalakîyan de mesajê piştîdayîşê HDPyî û xurtkerdişê têkoşînî ameyî dayene.
Bajaranê Berlîn, Hamburg, Stuttgart, Aachen, Freîburg, Bremen, Bîefeld, Munîh, Duseldorf û Frankfurtî yê Almanya de çalakîyî ameyî viraştene. Çalakîyan de bi hezaran kesî rayîr ra şîyî û vera hêrişan de reaksîyon nîşan da.
Xeylî bajaranê Fransa de Kurdî û hêzê demokrasîyî vizêr reyna kuçeyan de bî. Bajaranê Parîs, Marsîlya, Lorîent û Bordeauxî yê Fransa de çalakîyî ameyî viraştene. Çalakîyan de vera xespkerdişê şaredarîyanê Amed, Wan û Mêrdînî yê HDPyî de reaksîyon ame nîşandayene û ame vatene ke Kurdî sey vizêrî ewro zî do rixmê heme herîşan çok nêdê û bi xoverdayîş ser bikewê.
ANF/BRUKSEL