ROJDA OGUZ / ANF/STENBOL
Edîtora Kovara Demokratîk Modernîte Servet Onere derheqê sîyaseto ke Rojhelato Mîyanên de yeno meşnayîş û vera nê sîyasetî de vindetişê kurdan de qisey kerde û vînayîşê xo arde ziwan.
Edîtora Kovara Demokratîk Modernîte Onere va ‘seba ke Tirkîya hetê mîyanneteweyî de çîyêko waşte dest nêviste, sîyasetê parçe bike û îdare bike dibare kena’ û wina dewam kerde: “Tirkîya wazena kurdan reyde şer bikera û bi no hawa azadîya kurdan taloq bikera û nêyî ser ro îqtîdarê xo bidomna. Her gama ke kurdî Rojawan de erzenî, hamleya taktîk û stratejîk ya kurdan, seba Erdoganî beno tehdît. Labelê wa Erdogan baş bizano ke polîtîkaya Rojhelato Mîyanênî goreyê waştişê ci şekil nêgena.”
Onere dewamê qiseykerdişê xo de dîyar kerde ke Tayyîp Erdoganî zîyaretê xo yê Urdunî ra ver teyara de vatbî ‘ma do destûr nêdî ke Vakurê Sûrîye ra korîdorêk ver bi Behrosîya bêro akerdiş. Eke çîyêko winasî bibo, ma do çimsûrî bikerî’ û va: “Esasê xo de teberê Îranî de heme hêzî kopyayê zalimî yê rojawanî yî. Reyna zîhnîyetê Baas û DAIŞî girêdayeyê îqtîdarê kapîtalîstî yî. Seba Rojhelato Mîyanên çîyo muhîm o yo ke awankerdişê îdeolojîyêkê antî modern, antî dîn, antî cînsîyetperest o. Seba nêyî xeta ke Tevgerê Azadîya Kurd Rojawan de awan kerdo, mîrasê heme şaran o.”Kurdî Kobanê de tena bîy
Onere qala vatişanê Erdoganî kerde û wina va: “Beno ker Erdogan çimsûrî bikero û hewl bido ke azadîya kurdan taloq bikero û bi no hawa îqtîdarê xo derg bikero. Beno ke vera Efrînî de yan zî vera kantonanê bînan yê Rojawanî de hêriş organîze bikero. Labelê wa nêyî baş bizano ke polîtîkaya Rojhelato Mîyanênî goreyê Erdoganî dîyar nêbena. Rojawan de xetêka cîddî ya xoverdayîşî esta û nika îttîfaq û hêzê ke Kobanê ra cîya yî, estî. Kurdî Kobanê de tena bîy, labelê nika hêz û îttîfaqê cîya-cîyayî estîy. Cok ra Erdogan biwazo zî wina bi hawayo asan nêşeno hereket bikero. Tirkîya sere ra nata bi polîtîkayanê şaşan Sûrîye de ya. Çimkî Tirkîya YPG, YPJ û HSDyo ke vera DAIŞî de şer kenî girewta dûştê xo. Beno ke Reqqa ra dima vera Deyrazorî de zî operasyonêk hetê HSDyî ra bêro organîzkerdiş. Teşebusê bi nameyê ‘Firat Kalkani’ zî ser dişmenîya kurdan ra ame kerdiş. Îzehetê Erdoganî ra yeno famkerdiş ke Erdogan hewl dano Rojawan de zî polîtîkayanê hemkarîyan bimeşno. Eke Tirkîya mudaxaleyê Efrînî bikera, yewîya kurdan bihêz kena.”
Nika wext wextê kurdan o
Onere bale ante muhîmîya awankerdişê Modernîteya Demokratîke ser û wina va: “Kurdî Rojhelato Mîyanên de rolê kilîdî de yî. Kurdî heta nika qet rolo hakim de nêbîyî û no vindetişêko muhîm o. Têkoşînê kurdan têkoşînêko antî kapîtalîst û antî îqtîdar o. Xeta kurdan herême ra ver bi merkezî şona û na xete seba Rojhelato Mîyanênî nêba nêbena ya. Eke kurdî Rojhelato Mîyanên de qezenç bikerî, no zî yeno manaya awanbîyayîşê yewîya kurdan. Cuya azade ke kurdî wazenî awan bikerî, ewro Rojawan de vejîyaya orte. Çimkî yewîya kurdan eynî wextî de yena manaya nasnameyo azad. Eşkenî hêriş bikerî, û bi no qezencanê kurdan taloq bikerî, la wext wextê kurdan o.”
Domanê do ma kura de bimanî?
Çend rojî verê hezar mamostayê ke Kurdistan de endamê Egîtîm Senî bîy, ameybî surgunkerdiş. Nê mamostayan ra hûmara tewr zaf bajarê Riha ra ameye surgunkerdiş.
Babete ser o mamostayê ke ameyî surgunkerdiş, qisey kerdî. Mamostayan ra Murat Oruço ke surgunê bajarê Çorumî bîyo, wina va: “Cinîya mi surgunê Nevşehîrî bîya. Nê surgunî bi hawayo ‘seba ke lazimî esta, cayê şima ameyo bedilnayîş’ ma ra ame vatiş. No surgun o û qetilkerdiş o. Ez bawer kena ke do bi têkoşînê sendîka no pûç bibo. Îqtîdar bi hawayo dişmenî nizdîyê ma beno. Domanêkê ma 4 aşme yo, o bîn zî 7 serreyî yo. No zulm o. Ma Roşananê Qurbanan de îqtîdarê AKP û MHPyî rê ameyî qurbankerdiş.”
Hemserekê Egîtîm Senî yê Şûbeya Riha Îsmaîl Tutalo ke 20 serrî yo ke mamosta yo zî surgunê Afyonî bîyo. Tutalî wina va: “Roşanê Qurbanan yo bîn de 462 mamostayî karî ra ameybî dûrîkerdiş, no roşan de zî ameyî surgunkerdiş. Wazenî keyeyan parçe bikerî. Qanûno Bingeyî binê lingan de yo.”