‘Kurdî saya PKKyî de estê’

Dewleta Tirkî aşma Gulane ra nata yo ke hêrişê Başûrê Kurdîstanî kena û hewl dana ke Başûr de kontrolê xo awan bikera. Heta nika operasyonê ke hetê artêşa Tirkî ra vera Bradost û Xakûrkê de ameyî kerdene û vera nê hêrişan de xoverdayîşê gerîlayan bêmabên dewam keno. Partîya Demokratîke ya Kurdîstanî (PDK) zî destek dano operasyonan.

Vera nê hêriş û dagîrkerîye de reaksîyonî her ke şono zêde benî. Bi nameyê Mişîr Xidirî de dewijêkê Başûrî bale ant hêrişan ser û seba endamê Konseyê Serekîya Pêroyîye yê KCKyî Dîyar Xerîb ke netîceyê hêrişan de şehîd bi, va “Ê kesan ra yew bi ke seba Kurdîstanî kedêka pîle daye. Seba ke Kurdistan de yewîya neteweyîye virazîyo yew bi yew merdiman dir qisey kerd û ê goşdarî kerdî. Seba ke Kurdî yewbînan nêkişê, seba yewîye û yewbînangirewtişî xebetîyayêne. Dîyar Xerîb ê embazan ra yew bi.” Xidirî vera hêrişanê hewayîyan ê dewleta Tirkî de reaksîyon nîşan da û wina va: “Eke Qendîl bin bikewo do Başûrê Kurdistanî bi temamî bin bikewo. Nika ma nêeşkenê şirê tayê dewanê xo, çunke tim hêrişê hewayîyî estê. Dewe de ma bi zîretî debara xo kenê. Labelê nika ma ne eşkenê heywanan miqate bikerî û ne zî karê zîretî bikerê. Binê nameyê gerîlayan de tim ma kişenê. Her roje Qendîlî ser o bombayan varnenê. Eke Qendîl bin bikewo do Başûr û hemeyê Kurdistanî bin bikewê. Çunke Kurdî saya PKKyî de estê. Partîyê Kurdistanî heme saya PKKyî de estê. Seba keda Dîyar Xerîbî ganî Kurdî heme bibê yewe.”

LALEŞ RÊNAS/ RÛHAL YILDIZ / ANF / BEHDÎNAN