Paytexta Fransa Parîs û sûka ci Marsîlya de semedê Rayverê şarê Kurd Abdullah Ocalanî xeylê nûmayişî virazîyayî. Nûmayişan de terora AKP-Erdoganî ya verra kurdan şermezar bi.
Siwîsre ra heta Îtalya, Bukreş..
Sûkanê Îsvîçre de zî Kurdistanijî û dostê ci vecîyayî kuçeyan û semedê xeber girotişê Rayverê xo vengê xo berz kerdî. Paytexta Îtalya Roma de zî bi rayveriyê Merkeza Kultur ê Ararat de yew mîtîng organîze bi. Xeylê Kurdistanijî ameyî pêhet û terora AKP ra pîya bêvengîya Awrûpa şermezar kerd. Verva zilmê AKP şarê Kurd peytaxta Romanîa Bukreş de zî meydana de yê. Kurdistanijan navendê sûk de xêma nobedî ronay û derheqê felsefê Ocalan û hêrîşanê AKP ê ser şarê kurd de zûnayîş kene vila.
Almanya de zî nêrazîbîyenî
Rayverê Şarê kurd Ocalanî ra xeber nêgirewtiş xelyek sûkanê Almanya de zî raştê reaksîyonanê tûnî yê kurdan amê. Dortmund de Kurdistanijî pê yew şîyayîş û mîtîngî wahar Rayverê xo vecîyay. Qalkerdişan de waştenê azadîya Ocalanî ame ser zûn û hikumeta Almanya ra zî wazîya ke AKP rê paştgerê caverdî. Frankfurg de zî waştenê azadiyê Ocalan bi berz. Nûmayişkaran terora AKP ra pîya paştdayenê dewleta Almanya rê hêrs û nêrazîbîyenê xo arde ser zûn û mesajê ‘hetûn serbestîya Ocalan dê kuçeyan de bê’ ame dayen. Stuttgart de zî pê yew nûmayiş Ocalanî ra pîya azadîya pêrokîn tepişteyanê sîyasî yê kurd, yê ke guretxaneyanê Almanya de yê zî wazîya.
Paytexta Swed Stockholm û xelyek cayanê bînan de zî nûmayişê cîya cîyayî virazîyayî û wazîya ke malbat û pawitoxê Ocalanî bi ey pêdiyayîş virazî.
Bakûr de ‘Nobeda Azadîye’
Serva serbestîya Rayverê Şarê Kurd Abdullah Ocalanî Amed ra dima Riha û qezayanê ci de zî Nobeta Azadîye destpa kerd.
Amed de bi rojano serva serbestîya Ocalanî Kurdistanijan destpa nûmayişa nobedgiroten kerdî. Rexmê mudaxale û êrişanê quwetanê dewlet nûmayişkarî peyser gam nêerzenê û nûmayişa xo ramenê. Amed ra dima Riha û qezayanê ci de zî serva serbestîya rayverê xo kurdan destpa ‘Nobeta Azadîye’ kerdî. Merkezê sûk ra pîya qezayanê ci Wêranşar, Pirsûs, Xelfetî û Hewag de nûmayişê nobet virazyenê. ‘Nobeta Azadîye’ ke bi rayverîna rexistinanê HDP û DBP ê sûk û qezayan de organize bena bi seyan welatijî tewr bî.
‘Roj rojê serewedartiş o’
Hûnca Komelê Kultur û Sanat ê Rihara ra qefleyê muzîk zî pê deyranê xo reng da çalakî. Nobet her şûnd binatê seatanê 20:00-24:00 de tepişyena û heta Ocalan ra xeber guretişî dewam kena. Çalakvanan eleqa ûnt muhînê rewşê Ocalan ser û Rayverê xo rê giredayinê xo ûna arde zûn: “Tirkiyê yew tiyemiyanbiyayîşo xorê esto û ma Rayverê xo ra xeber negenî. Dewlet her roj şarê kurd qetil kena coka ci rê tivariyê ma çîno. Hetûn pawitox û keyeyê Ocalanî ey bi çimanê xo nêvîne zerrîya ma rehat nîya. Cok ra nûmayişê ma ramenê.
NAVENDÊ XEBERAN