HAYRÎ DEMÎR / MA /ANQARA
Çend rojî verê Parlamenterê HDPyî yê Riha Osman Baydemîrî seba ke Heyetê Pêroyî yê Meclîsî de vateyê ‘Kurdistan’ şuxilna, tarîxê Meclîsî de reya sifteyîne cezaya ‘Meclîs ra vetişê demkî’ girewt.
Babete ser o Baydemîrî qisey kerd. Baydemîrî dîyar kerd ke na ceza seba eyî çîyo rûmet o û wina va: “Mi heqîqete va, karêko gird nîyo. Raştîya xo de ganî merdim ser persê ‘çira vera vatişê Kurdistanî de hende nîjadperestîye vejîyena aver?’ de bivindero. Çîyêko mi Meclîs de va, ez tîya de dibare kena. Awanbîyayîşê Meclîsî ra dima heta serra 1924î 4 hezar reyan vateyê Kurdistanî ameyo şuxilnayîş û belgeyan de derbaz bîyo. Qe çinêbo davîst qiseykerdişê Ataturkî de zî estî. 1924 de ame qedexekerdiş se bî? Gelo problem çareser bî. Na cezaya ke dîyaye mi, nêşêna ser heqîqete pada. Ê Berê Koyî de ma sey Şêx Seîdan îdam zî bikerî, Kurdistan Kurdistan o. Kurdistan tena zerrîya mi de nê, zerrîya 40 mîlyon kesan de yo.”