Hetêk ra dewleta tirk, hetêk ra Fransa. AKP û dewleta tirk dor bi dor şî ser çapemenîya kurd. Verê cû Ozgur Gundem qefilna. Dima ra Ozgur Gun TV û ÎMC TV stalaytê Turksat’î ra vet. Hemberê AKP û dewleta tirk vengêk berz, nerazîbîyayîşêk gird zi nîbi. AKP û dewleta tirk dima ra JÎYAN TV, Zarok TV, Azadî TV, Wan TV û radyoyê cîya cîya qefilnê. Dest na ser pêronê mal û mulke çapemenîya kurd ro. Reyna nerazîbîyayîşêk pîl nîbi.
Wexto ke hina bi, dewleta tirk destê xo hetanê Fransa derg kerd. Fransa zî bî şîrika AKP û dewleta tirk. Weşanê Med Nûçe da vindarnayîş. Hina aseno ke Fransa zaf çi AKP û dewleta tirkî ra girewtî ke, ver nê çîyan Med Nûçe girewt. Zobî zî hina aseno ke yew konsept yane planê newe yeno ramnayîş. Ewropa de zî zafe welatan zereyê nê planî de cagênî. Dewleta tirk a dagîrker dest dawo pêronê çapemenîya kurd ser, dinya de yew veng çino. Nayî ser ra zî Fransa, AKP û dewleta tirkî ra şîrikayî kerd û Med Nûçe zî girewt.
Dewletên Ewropa û dewleta tirk pîya yew sîsteme. Esasî de yewnî ra cîya cîya nîyê. Baw kalanê ma qey dewleta tirk, vatênê dewleta gavura. Yane vatênê dewleta zalima û Ewropa ra girêdayîya. Raştîya vatişê baw kalanê ma vejîya werti. Dewletê Ewropa û dewleta tirk pîya wazenê vengê şarê kurdî bibernê. Xora nika ra zî birnayo. Dima ra zî Kurdistanê de komkiştiş virazênê û seba ke yew pê nîhesibi.
Planê dewleta tirk û dewletên Ewropa hina zelal o. Wexto ke planê înan hina zelal bo, gera şarê kurd zî hemberê planê înan xo zelal bikero. Hetanê stalaytê kurdan yê bixo çin bo, hetanê Kurdistan azad nîbo, do bi hezaran TV, radyo, rojname û kovarê kurd hetê dagîrker û emperyalîstan bêrênê qefilnayîş. Şarê kurd gera na raştî bivîno gore na raştî têkoşîn bikero.
Çi Kurdistan, çi Ewropa beno gera pêronê şarê kurd hemberê AKP û dewleta tirk bivejîyo, wayîrê dezgehe çapemenîye xo bivejîyo. No hetê ra zaf zeyîfî asenî. Hetanê Kurdistanê Azad awannîbo, têkoşîna xo hembere pêronê dagîrkeranê tirk, ereb û persan bikero. Wexto ke Kurdistanê Azad awan bibo, weşane radyo, rojname û TV’ya azad bibo. Bi hezaran radyo, rojaname û TV’yê kurdan weşan bikerenê. Xora zobî ti rayîrêk bîn çina ke. Wexto ke hina bibo, bi Kurdistanê Azad ra Med Nûçe û pêronê dezgehê şarê kurd yê çapemenî zî azad bibenê.