1’ê Mijdare Roca Kobanê ya Cîhanî bî. Di tarîx de rocêy wina tarîxî ke di hafizaya civatî ya cîhanî de ca girewtê, kemî yê. Di Kobanê de xoverdêrî û qehremanîyêka ke heta nika nîyameya saloxdayişî, amî nîşandayîş. Helbet di dinya de xoverdêrîyê şaran êy bierjîy est ê. Zey Stalîngrdad, Parîs û Vîetnam...
Di mîyanê nînan û Kobanê de, her hetî ra cîyayîyê zaf girdîy est ê. Belkî merdim şikeno lehengîya “Hîrsey Spartayijan” bişibêno Kobanê. Reyna yeno zanayîş ke paştîya xoverdêrîyanê Stalîngrad, Parîs û Vîetnamî de dewletê înan û dewletêy hetkarê înan est bîy.
Kobanê, hem bi goreyê feraset, hem zî bi goreyê şertanê herême, têkilîyanê mîyannetewî û konjokturê cîhanî, rewşêka taybet a. Xoverdêrî û efsaneya Kobanê, hetê xort û cînîyanê şarêkê ke tim çinê ameyo hesebnayîş, estbîyîşê ey nêyameyo qebûlkerdiş û di welat û herêma xo de tim bi qetlîam, qirkerdiş û sirgûnan reyde rîbirî mendo ra, amî dayene. Coka xoverdêrî û lehengîya Kobanê, bêfinak a. Kobanê, esasanê paradîgmaya Rayver Ocalanî ser o, nameyê bixobawerî û biserkewtişê îradeyê azadî yo.
Hêzanê ke DAIŞî organîze kerd û înanê ke weye kerd, zaf an tay encamê hovîtîya DAIŞ’î texmîn kerdê. Bi goreyê nêy texmînan hesabê xo kerdîbîy û plan û projeyê xo viraştîbîy. Bi no semed ra zî verê DAIŞ’î da ra şarê Kurdî. La tu hêzêke xoverdêrî û bixobawerîya şarê Kurdî ke bi paradîgmaya Rayver Ocalanî newe ra amebî xuliqnayiş, hesab nêkerde.
Kurdîtîya newîye ke Vakûrê Kurdistanî de bi şerrêkê çekdarî yê fîîlî yê 33 serran verva hezanê herême û heme hetkarîyanê NATO şer kerd, na dore Kobanê de û dime ra zî Şengale de xo nîşan da. Kurdîtîya ke heta a roce hetê hêzanê Cîhanî û hereme ra, zê pêkayokêka seba hesaban bêro bikarardiş, ameyê weykerdene çim ra kewte.
Merdim şikeno rewşa kaos û têkîşîyîşê ewroyinî yê Başûrî, îtîya ra bi dest bigêro. Heta xoverdêrîya Kobanê ke dinya de behsê şarê Kurdî ameyê kerdene, Başûr û rayverîya Başûrî ameyê vîrî. La badê Kobanê û Şengale, êdî kurdêko newe dinya de ameyê naskerdene. Di rojdema cîhanî de xoverdêrî û qehremanîya nêy kurdan ameyê qiseykerdene. Rayverîya Başûrî zî bi ferasetê xo yo malbatî, têkilîyê qilêrinan yê aborî û bêpergalîya xo ya ke tenê menfîetanê malbatî û hîzbî sero amebî awnakerdiş, ameyê naskerdene.
Rewşa sosrete ya Şengale bibî eynikê/lîlikê rayverîya Başûrî. Bi vatişêko bîn “karîzma têk şibî”. Başûr bibi yê Malbata Barzanî û YNK. Rayverîya Başûrî rê seba lûmitişê ney têkşîyişî kayêke hewce kerdê. Seba naye zî hestê şarê Kurdî, bazarê vergan de eştîy mezatî ver. Referandûmo bi bi nameyê azadîye seba naye, rayira tewir kêrameyîye bî. Bêke goşdarîya şarê xo bikero, paştîya xo bi dostanê xo yê ke neyarê tewir pîlîy êy şarê Kurdî yê gire da û felaketêka tarîxî ard sereyê şarê Kurdîy. Şewêke de se ra 40’ê axa Kurdistanî teslîm kerde.
Bi na felakete çîyêko muhîm vecîya orte. Kurdîtîya Kobanê û kurdîtîya Kerkûkî. Gere êdî hetê heme kesanê ke heta nika nêdîya û nêwazenê bivînêyan ra bêro zanayîş, ya ke Şarê Kurdî bixelesno, kurdîtîya ke bi paradîgmaya Rayver Apoyî ameya xuliqnayiş ya Kobanê ya.
Na kurdîtîye di Rochelato Mîyanên de aktoro sereke, yewîn hêza wayir plan û projeyanê çareserî ya herême û heme persgirayanê merdimayî ya cîhanî ya.
Bi na wesîla, ez verva heme leheng û şehîdanê ke na kurdîtîya newîye bi cîhanî da şinasnayişî û bîy omûdê şaran, bi rêzdarî bi vîr arena û beşna xo tewênena.