AZAD CAN / HANNOVER
Lehçeyê tewr qedîm yê kurdkî Kirmanckî bineyê talokeyê vîndî bîyene de ro. Goreyê lehçeyanê bîn kirmanckî hetê nuştiş, wendiş û gramerî de zaf pey de mendo. Seba verî girewtişê na taloke hewldayenê sazgeh û şexsîyetanê kirmancan ramenê.
Sûka Almanya Hannover de kî na hetî de gameke gird amê eşten û kursê kirmanckî destpa kerd. Kursî de Hewraman ra heta Dersim, 4 serre yî ra heta 70 serre yî, 74 kesan xo qeyd kerdo. Kursî de 2 grûbî est ê û her roja yewşeme nezdîye 50 kesî tewrê kursî benê.
Kurdistanijê ke sûka Almanya Hannover de cuwîyenê bi rayverîna xebatkaranê Kargahî e.V amey têlewe û seba vernî girewtişê polîtîkayanê asîmîlasyonî û seba wayîrvejyayîşê zon û kulturê xo destpa kursê kirmanckî kerdî. Xort, kal, doman, cinî, camêrd, roşnvîr, malim, karker, wendekar 74 kesan seba musîyayîşê kirmanckî qeydê xo kerdî. Tayî kombîyayîş û amadekarîyan ra dima kurs 6ê aşma Kanûne 2016î de destpa kerd. Kursî de herzewbîn 3 pedagokê sosyalî û 7 mamosteyê ziwanê kurdî estê.
2 grûbî estê
Kurs o ke sifte bi 15 kesan destpa kerd banê kargahî e.V de hetê nuştox û mamoste Akman Gedîkî ra yeno dayen. Kurs, roja yewşeme saet 13:00 de destpa keno heta seat 15:00î rameno. Kursî de 2 grûbî est ê. Gruba juyîne de domanê mavêna 9-10 serrî ca gênê. Ya bînî de kî dormeyê 35 serrî kesê pîlî estê. La herzewbîn 4 serre yî ra heta 70 serre yî kesî kursî de ca gênê. Heta nika 74 kesan xo qeyd kerdo. Tenya yê ke kirmanckî qisey kenê nê, hetê herema Rojhelatê Kurdistanî Hewraman ra zî tayî kesan xo seba kursî qeyd kerd. La se ra 60ê kursîyerî Dersim ra yê. Goreyê melûmatê ke organîzatoran day her roja yewşeme nezdîye 50 kesî tewrê kursî benê.
Gruba domanan
Gruba juyîne yê domanan, ya bînî kî yê pîlan a. Gruba domanan de bi metodanê, tîyatro, kay, muzîk û çîyanê bînan, bingeyê zonê Kirmanckî, strukturê gramerê Kirmanckî bi enwayêde zelal û asan domanan rê yeno dayen. Bi naye domanî besekenê têkilîya xo ya sosyale û kulturkîya Kirmanckî de girêdê. Armanc no wo ke wa domanî bisîkîyê mîyanê xo û zonê xo de, mîyanê xo û kulturê welatê xo de, mîyanê xo û sosyalîteya sarê xo de jû pird ronê.
Gramer, wenden û nuştiş
Gruba diyîn yê kesê pîlan a û seba na grube armanco verên musayenê zon û gramerê zonî yo. Kesê ke zonê xo nêzanê, ya kî rind nêzanê, êşkenê na grube de ca bigîrê, zonê xo bimuso, gramer, wenden û nuştişê zonê xo bimuso. Êyê ke zonê xo sîkînê qesê bikerê kî wa zonê xo ravê berê, bisîkîyê binuse û biwane. Armancê bînî yê kursî kî no wo ke, mîyanê hurdî gruban de ronayişê têkilîyêde neweye yo. Hedef no wo ke wa domanî, dayike û pîyî bisîkîyê têkilîyanê xo yê rojanîye de bi zonê xo, bi Kirmanckî qesê bikerê. Na babed de wezîfe tenya yê mamosteyan nê, yê kesê ke yenê kursî yê înan o kî.
Seba kursî eleqeyekê gird esto. No kurs herzewbîn Hannover de seba projeyanê hinayî bingeyêke rind rona. Xebatkarê Kargahî e.V anê zon ke yê ke wayîrê zon, kultur û erjeyanê xo nêvejînê nêşkenê wayîrê çîyekî bivejyê.
