Faşîsto pîl hawo çond rojî yo îdam ra qesey keno.
Hukumat dero, her çî ey dest dero.
Kam vireniya ey ceno ke.
Eke rast honde torenayîsê xo esto qerar bijero qanunê îdamî vezo.
Zulmo ke verva kurdan beno, hora îdam ra xirêavin o. aya ke nêbiye, na hukumatê faşîstî kurdan rê kerde.
Bi hezaran kurdî hepisxanê faşîst de poyenê. Faşîst wazeno na nuxta de vatîsê pîyê xo yê sîyasî Kenan Evren bîyaro kar.
Pîyê faşîstê pîl Kenan Evren se vat bî? “Naynu darde nêkerî weyiye kerî”
Nika lazê pasay yo siyasî tam na polîtîka rameno.
Aynî ber o da. Aynî gonya faşîst a tomora hurmîne de herîkîna.
Nînan de tomora demokrasî çîna ke, gonya demokrate zî tey bifeteliyo. 
Piyo siyasî ke çi bî, lazo siyasî zî hen yo. Faşîst ra faşîst, dîktator ra dîktator ra gino waro.  Kenan Evren bi faşîstê pîl ra zî tam niya rê.
Faşîsto pîl nika amo vatena piyê xo yê siyasî ser. Îdam ra qesey keno, merdena kurdan wazeno, merdena demokratan wazeno.
Kam ke verva ci muxalefeto rastken keno, eyrê heqa weşiye nêwazeno. Zulmê zalimî nî rozan de şîndor nasnêkeno. Seweta serdestiya xo meyîtan sero fetelino, payna cendeganê mosiman dano.
Kuzê awe raya awe ra şîkîno vanê. Pekî va îdam biyaro! O, zî na raye ra sono. Dewrano no çerexîno. Na dina, na serdestiya keşî rê hata peyniye yar nêbenê.
O waxt se beno?
Cevabê xo zaf rehet o: Kam ke sero wo gineno bin ro, kam ke bin dero vejîno ser.
Dewran ke çerexiya niya beno. Saltanatê Sultan ke rijiya, Sultan binê paga xo de maneno. Dês rijîno ey ser.
O waxt dewran û serdestiye kunê ra bindestan dest. Bindest zi qanunanê faşîstî anê kar. Bindestî qanuno newe amade nêkenê. Verecoy qanunê faşîstî verva faşîstê pîl anê kar.
Mezal bi faşîst nêdanê, desinde erzenê ra dare. Zahmet-mahmet çîno, çike faşîst ebi destê xo her çî kerdo amade. Bındestan rê teyna defin kerdena manena, çike faşîst bi xo zî cellad o.
De hayde faşîst qanun biya, îdam veze ke tora hesavê Roboskî pers bo!
****
Endî beso! Nika tam waxt o: Sazî, dezge û rêxistinê ma gune endî tirkî weşiya xora vezê. Rojnamê ma gune pelganê tirkî kêmkerê, televziyonê ma programanê tirkî kêmkerê, siyasetvanê ma eskerakerdîsan bi zonanê kurdistanî bide.