Yewîya Pawitişê Sîvîlan (YPS) ke xoverdayîşê Xoserîya Demokratîke de rolêko gird kay kerd mîyan de bi seyan hîkayeyê xoverdayîş û qehremanî estî. Nînan ra yewe zî hîkayeya Zindan Borî ya. Bor 1997de Wan de yeno dinya. Boro ke sîstemê perwerdeyî yê dewlete red kerd, fek mektebî ra verada. Hîna 13 serreyîya xo de beşdarê xebatanê ciwanan bî. Boro ke bi cesaret û fedakarîya xo ameyêne şinasnayîş, meşîyayîşêk de yeno tepiştiş û tewqîf beno. Wexto ke tewqîf beno hîna 14 serreyîya xo de yo. Seba Rayberê Şarê Kurdî bi kewt grevê vêşanî û bi desan reyan bi veşnayîşê koguşî vera tecrîdî de reaksîyon nîşan da. Badê ke serbest ame veradayîş 2011 de beşdarê gerîla bî. Wextê gerîla de linga xo ra birîndar bî. Her çiqas ke wextê Xoverdayîşê Kobanê de linga ci baş nêbîbî zî bi îradeya xo beşdarê xoverdayîşî bî. Bor nê xoverdayîşî de her di lingê xo ra birîndar bî. Badê ke tedawîya ci qedîya, na rey ame Wan û beşdarê xoverdayîşê Vakurê Kurdistanî bî.
Ez do biba gerîla
Dayîka Zindanî Sureyya Ozdemîre derheqê lajê xo de wina va: “Badê ke mêrdeyê mi kewt zindan, ez mecbûr bîya ke 2 domananê xo reyde bicuya. Zindan bi hawayêko kêfweş beşdarê xebatanê ciwanan bî. Tim hetkarîye dayêne embazanê xo û giredayeyê embazanê xo bî. Rojêk televîzyon de gerîlayan dî û mi ra va ‘Dayê, ezo zî rojêke biba gerîla, eke ez şehîd biba meberme. Destê mi hene bikerê. Canê mi partî û gerîla ra muhîmêr nîyo.’ Zerrîya kamcîn dayîke qebul keno.”
Ma azad kerd
Dayîke Ozdemîre da zonayene ke aye çar serran lajê xo gêraya û wina va: “Lajê mi şîbî gerîla. Şerê Kobanê ra dima ma gêra. Dima ra reyna gêra û va ‘dayê to rê mizgînî, ma Kobanê azad kerd’. Çend rojî ra dima ame Wan û wexto ke polîsan eşnawit ke Zindan ameyo Wan, çend reyan eştî keyeyê ma ser de. Polîsan vatêne ‘Ma kura de Zindanî bitepişî, ma do bikişî.’ Dima ra mi xebere erşawit lajê xo û mi waşt ke Zindan Wan ra bivejîyo. La mi ra va ‘eke ez rojêk bikewa destê dişmenî, ez do teslîm nêba; heta peynî şer bikera û dima ra guleyê xo pana sereyê xo.’ Lajê mi qet teslîm nêbî.”
‘Waştêne xo feda bikero’
Xalê cı Bulent Ozdemîrî zî dîyar kerd ke ganî sey komel ma vindetişê Zindanî ra ders bigirî û tena waştişê Zindanî o bî ke xo seba Kurdistanî feda bikero.
Yayka Borî Kader Ozdemîre zî wina va: “Roja 21ê êlule 2016 de ma vengê sîlehan eşnawit. Mi o wext maya xo ra va ‘gelo na rey keyeyê kamî veşnayî?’ Dima ra mi şewe hewnê xo de Zindanî dî. Heta ke ma şî cayê hedîseyî zî ma nêzanayêne ke Zindan şehîd kewto. Cayê hedîse de tayînan rîyê ci tarîf kerdî, mi o wext fam kerd ke Zindan şehîd bîyo. Rîyê ci yê hûyaye tim vîra mi de yo.”
ANF/WAN