Nê ciwanê Federasyonê Komelayanê Sosyalîstan(SGDF) tenê mexsed û miradê yine semed newera înşa kerdişê Kobanî de kedêka yine zî bibayê. No newera înşakerdiş de yê zî tûxlêk, kerêk ronê. Hetkariya yine zî tede bibo.
Heme ciwanî ciwanê wayir wijdanîy bîy. Pêro wenday bîy. Îlmê xo ra tehm girotbe. Îlmêko vînaybe pêroy kerdîy bîy wayir wijdan û exlaqî. Şîarêk esta vanê: “Wexto cîranê to weyşan bo, ti mird bikêw ra (rakêw) ti mara nîyê”. Bi na şîare kewtîbîy raye.
Tenê na nê. Raynê yena vatiş wexto cayke verê çimanêy tode tehda zilm bibo lazimo ti mudaxele bikerê. No mudaxele ewil ti êşkay raşta raşt mudaxele bikerê. Wexto ewna nêşkê bi vatişanêy xo ti nêşkêy bi vatişan zî bikerê lazimo ti zerêy xo da xo aciz bikerê. Nê ciwanan se vat : “Ma teydir xelesna (Kobanî) ma wo teydir newera înşay cey de bixebetyim.”
Tenê bi namexsed dekewtîy raye heme bajaranê Turkiyay ra. Pirsûs de resay pêy. Go Kobanî de bi qasê qewetê xo xebate bikerdêy. Semed domanan parqe biviraştêy. Semed pêro merdimatîy û însanetîy zî go pirtûkxane biviraştê. Nê pêro wenday bîy zanêy zanayî bi wendiş beno. Wendiş zî bi pirtûkan beno. Madem Kobanî de newera înşa. O wext lazim newera înşa bi wendiş. No wendiş zî bi deste îktîdarî nê. Hemi ciwanîy şagirtê zanîngehan bîy. La zanayişê xo dibistananê dewlete ra nêgirewt be. Wexto merdim semed zanayiş cehd nêkero, dewlet tenê wazen xo rê berdevk bivîno. Wendişê yê danêy tenê kenê zey xo. Bi wendişêy dibistananêy dewlete êşken bibê walî û heme meqamê dewleted ca bigerê. La nêşkenê bibê merdim.
Semed nay hîkayêk yena gerey kerdiş: “Babêw û lacê cêy bibîyêy. Babê awnêy tebat û lebatê lajê xora nê ecebnê. Semed merdimatî û însanetîyrê başbo şîretîy kerdêy. La lajî goş nêdêy babêy xo. Babêy zî lajîy ra fehm kerd bi. Vat lawo ti nêbenê merdim. Laj nê vatişê babêy xo ser kê terk kerd şi. Çend serîy sera vêrtîy ra lajî wend bi walî. Rojêk rojan ra di hebî yawerê xo rêşawitî kê babê xo vat şêrê dest cêy kelepçe bikerê. Biarê meqamê min. Walîyo emrê cê bi ca ard. Şiy bi destê kelepçe kerdan arde meqamê walî ku walî lajê yê bi xo wo. Babêy awna lajê yê wo.”
Lajî vat: “Bawne to vat ti nêbenê merdim. Ho ez biya walî. Babê vat lawo min nê vat ti nêbenê walî. Min vat ti nêbenê merdim. Ku ti merdim bayê to bi destê kelepçe kerdan ez niyardê heta etya. Meqamê xo.”
Nê ciwanîy her yew wayir wijdan, tehsîlê xo semed merdimahîy semed însanetîy xizmetê şarê xo de bişixulnê dîy bi. Hewcêy kam erdnîgarîy ser bi hetkarîye bibo destê xo ra dergêy ewcay kenê. Eyro temamê dinya zana û vînen semed Kobanî hetkarî y lazim a. Nê ciwanan gamêk eşte. Heme dinya vîna. Ez bawera go mirad û mexsedê yine şêro sere. Hîrsey tenîy bîy.
Nesîp GULTEKÎN