Hemserekê KONGRA GELe Remzî Kartal derheqê şero toyekun ke no demo peynî de AKP hemverê kurdan de dayo destpêkerdiş de veng da heme şaran ke wa her kes xoverdayîşî hîna berzêr bikero û wina vat: “Îlankerdişê xorayîrberdişan tena rayîrekê ardişê aştî û demokrasî yo. Lazim o her kes vecyo raşteyan û xorayîrberdişan rê wayîr bivecyo û dijî zîhnîyetê qetilkar têkoşînî hîna berzêr bikero. Şarê kurd bi xorayîrberdişan hemverê şerê Erdoganî çareserîyek sîyasî aver beno û verba dewleta ke şer de israr kena de bi no hawa çareserîyek demokratîk avêr beno.”
Kartal dergeyîya qalîkerdişê xo de ciresna ke xorayîrberdiş tena xopawitiş nîyo û wina domna: “Xorayîrberdiş hemverê qetlîamê ke dewlet Kurdistan de virazena rê verpersek o. Xopawitiş parçeyek xorayîrberdişî yo. Ger ke yew şar her awayî çinbîyayîşî reyde rî bi rî bimano se, eşkeno xo bipawo. Şar bi xorayîrberdişî wazeno qelibnayîşê Erdogan a maseya çareserîyî rayna awan biko. Şarê kurd bi no hawa wazeno vaco ger ke persgirêka kurd bêro çareserkerdiş, lazim o xoserîya kurdan zî bêro dîyîş. Ma eşkenî bivacî şarê kurd bi îlankerdişê xorayîrberdişî, çareserkerdişê persgirêkî de israr keno.”
Wazeno qezenc bikero
Kartal bal ant ser weçînayîşê verwext ke do 1’ê Teşrîne de bêro viraştiş û wina vat: “Semedê ke weçînayîşek demokratîk bêro viraştiş lazim o şar tay hesas têbigêro û mudaxaleyê ravêreyeyî bikero. Lazim o şar ser weçînayîş bivindo û sey ke weçînayîş do bêro viraştiş têbigêro û bi ruhê seferbêrî xebatê xo bikero. Her çend ke no şerî Erdogan dayo destpêkerdiş zî tayîn vecênê tevgerê ma ra birrnayîşê adirî wazenî. Temam, waştişê aştî wayîrê mana yo, labelê ravêreyeya ke ma tede de îlankerdişê adirbirrnayîşo yew hetî semedê Erdogan fersend awan keno. Aye wext aramîya ke do bibo, şar vaco qey bi polîtîkayanê AKPe bîyo û no zî semedê ma do taluke bivirazo.”
Şer tecrîd rey eleqedar o
Kartal peynîya qalîkerdişê xo de qala tecrîdî kerd û wina vat: “Ger ke hîrrê serro ke tede qet merg nêvirazya û eyro her roj desan kes mireno se, aye wext no tecrîda ke Rayverê Şarê Kurd Abdullah Ocalan sero yeno meşnayîş reyde eleqedar o. Ger ke tecrîd nêro hawanayîş do welatî de hîna zafêr vinîbîyayîş bivirazo. Nêy semedan ra lazim o her kes dijî qetlîaman bivecyo raşteyan û têkoşînî hîna vîşêr bikero.”