Yardimkarê serokwezîrê tirkî Bulent Arinç naye ra avê zî kurdan rê heqeret kerd bî. O waxt vat bî: “Zonê kurdî zonê medeniyetî niyo.” Na semed ra Bulent Arinç ame bî rexne kerdene. Rexneyan ra dime jart-jurt kerd û vat ‘qusirê mi de niyamedê…!’ Yanî na mûnafiqî leborîna xo wast bî. Hama leborînade sexte. Weşiya mûnafiqan niya ra. Her roz 50 reye namê Heqî danê we, hama raştiye de weşiya xo hen nêramenê. Coka nî mordeman ra vanê mûnafiq.

Nî rozanê peyenan de Bulent Arinç onca qesey kerd û vat: “Zonê mayan de perverde wazenê. Hama niyetê nînan hengure werdene niya, baxçîvanî ro dayena. Çitur besekenê bi kurdî fîzîk, matematîk û kîmya biwanê. Na teyna bakurê Iraq de esta. Hayde domonanê xo birusnê bakurê Iraqî, oca zî nêrusnenê.” Onca marê heqeret keno. Îta de beno araze, ke AKPyîzê jê Bulent Arinç tam faşîst û nijadperest yê.
Nînan de terbiye çîna. Heqa jû qomî, zonê jû qomî qebul nêkenê. Bulent Arinç hebe ke bifikriyo, famkeno ke bi kurdî edebiyat esto, rojnameyî estê, televîzyonî estê û bi kurdî her derse zî yena dayene. Arinç bi xo rind zoneno, Başurê  Kurdistan de unîversîteyî estê, oca de bi kurdî dersî yenê dayenê. Oca de ke domonê kurdî zonê xo de matematîk, fîzîk, kîmya, biyolojî wanenê, bakur de ça nêbo ke. Hata nika sima zonê ma kerdo qedexe belka tam avê nêşiyo, no aybê sima wo, Bulent beg!
Tabî Arinç îta de bi zonayîs beno kor. Nêwazeno qomê bakurê Kurdistan zonê xo de biwano, zonê xo de perverde bivîno. Hebeke gonî tey bibo, sermayeno. Hata nî serranê peyenan, pêro siyasetvananê tirkî vatenê, ‘kurdî çîno.’ Bulent Arinç zî wertê nî siyasetvanan de bî. Çike wertê serranê 90 ra na het meclîse dero. Mi î serran de qeyta nêhesna ke Bulent Arinç vat ‘zonê kurdan esto.’ Peyniya qewxa kurdan de siyasetvanê tirkî mecburî mendî, televîzyon bi kurdî kerd ra. Îşte îta de Bulent Arinç gune bisermayo û vazo ‘herdo raqilaşiye, mi biqilotnero!’ Nika zî vanê “tamam zonê kurdî esto, hama matematîk nêbeno, kîmya nêbena, fîzîk nêbeno.” Honde zulumkariye kenê û raştiye nêvînenê.
Eke jû numune bidîme, Bulent Arinç kîmya de nî çekuyan ano kar: Hîdrojen, oksîjen, helyum, lîtyum, berîlyum, sodyum, sîlîsyum, potasyum, lantan, platîn û elementê bînî.  Pekî nî kelîmeyî tirkî yê? Nê, qeyta jû zî tirkî niyo, hama tirkî de yenê kar û kîmya yena wendene. Pekî ma de ça nêbo. Ma zî nî çekuyan ame kar, kîmya waneme. Hama se kena, yê jû mordemî ke kîmya xo biye xirave bi mantiq nêfikirîno, hen zoneno ke dîna bi zonê ey ama afirnayene.
Tamam, ma domonanê xo rusneme başurê Kurdistanî, çike oca zî welatê ma wo. Hama Bulent Arinç zî şero Asena xo bivîno û kotî ra ke amo şero oca. Asena raye misnena Bulent beg.