MELÎKE AYDIN/ŞÛJIN/DÊRSIM
Dêrsimo ke bi tebîetê xo bi hezaran tewir gandaran rê meymandarî keno, wextê operasyonê leşkerî de netîceyê bombevarnayîşê helîkopteran de daristananê Dêrsimî de şewat vejîya û şewat hewteyêk ra vîşêr o ke dewam keno.
Welatîyê ke seba mirênayîşê şewatî ver bi Kutuderesî kewtî rayîr, hetê leşkeran ra ameyî astengkerdiş. Leşkeran kewtişê dewa Pîlvenkî de xendekî kinitî û bi no hawa destûr nêdayî ke şar şewatî bimirêno.
Babete ser o Fîlîz Canane, Bahar Guneşe û Çîçek Bozoke qisey kerdî.
Canane va ‘wexto ke mi na manzara dî, ez hîna zaf eciz bîya’ û wina dewam kerde: “Helbuk aye herême nizdîyê qereqolî ya. Leşkerî vanî ewja de mayînî estî, labelê ma mergî ra nêtersenî. Dewlete dîyar kena ke nêşêna bimirêna, labelê nê heme mehne yî. Çimkî cêr de awe esta û eke biwazî destê înan de helîkopterî estî, eşkenî bimirênî.”
Bi vêşanî û zindanan tersnenî
Guneşe zî dîyar kerde ke daristanî warê cuyayîşî yê Dêrsimî yî û wina dewam kerde: “Dewlete tim bi betalî û zîndanî reyde tersnena. Tîya de rewşêka ke tersî derbaz kena, esta. Biters merdim eşkeno heta kura bicuyo? Wexto ke tebîetê ma şî, êdî çi maneno? Vera her kesî de berpirsîyarîya ma esta. Ganî ma tena xo nêfikiryî. Herkes vano ‘domanê mi estî’ û nînî, labelê tîya de ameyoxa domananê ma veşena. Yê ke domananê xo nêerşaweno, ganî o bi xo bêro. Ganî ma nêvajî ‘maro ke bi mi nêdo, wa hezar serrî bicuyo’, çimkî no welat yê ma hemînan o. Ganî ma çîyo ke keweno milê ma ser de, bikerî. Yê ke durî ra tena fotografan pare kenî, wa bêrî nizdî ra bivînî. Nê cayan de êdî vengê mîlçikan nîno, heywanî nêvazdanî.”
Barê ciwanan zî giran o
Çîçek Bozoka 69 serreyî zî beşdarê xebatanê mirênayîşê şewatî bena. Bozoke babete ser o wina va: “Barê ciwanan giran o, cok ra ez herinda ciwanan de ameya. Eke tîya de ciwanî mi bivînî, do eciz bibî.”
Veşayîşê Koyanê Kazan û yê Dêrsimî eynî yo
Meclîsê Ekolojîyî yê Stenbolî ra Fatoş Osmanagaogluye derheqê veşayîşê daristananê Dêrsim û Şirnexî de qisey kerde û vînayîşê xo arde ziwan.
Osmanagaogluye va ‘nê şewatî tesaduf nîyî, netîceyê operasyonê dewlete de vejîyayî’ û wina dewam kerde: “Dewlete nê şewatan vejena û bi no hawa tebîet talan kena û pêşkêşê sermaye kena. Bi no hawa hewl dana merdiman ca û warê înan ra bida koçkerdiş. Nînan seba ke herême de bingeyê heme çî awan bikera, kena. Dewlete nê kerdişanê xo verê cû bi hawayo nimite kerdêne, labelê nika bi hawayo aşkere kena. Bi no hawa destûr nêdana ke şar bi îmkananê xo daxî şewatî bimirêno.”
Têkoşînê Kurdistanî sey yê rojawanî nîyo
Osmanagaogluye dewamê qiseykerdişê xo de dîyar kerde ke çîyê ke vera şarê kurdî û yê rojawanê Tirkîya de yenî kerdiş sey yewbînan nîyî. Sey nimûne, şewato ke Koyanê Kazan de yenî vetiş, seba ke ê cayî rantî rê biakerî, yenî kerdiş. Labelê cografyaya kurdan de no cîya yo. Ewja de koçkerdişê şarî seba dewlete muhîm o. Têkoşînê ekolojîyî Rojawan de goreyê Mezopotamya hîna zaf yeno dayîş. Ekolojîstî fam nêkenî ke bajaranê kurdan ra dima dore do bêra înan. Ma seba ke bi înan bidî famkerdiş, têkoşîn danî.”
Ganî her kes bixebetîyo
Osmanagaogluye peynîya qiseykerdişê xo de wina va: “Ganî her kes bixebetîyo û çîyo ke destê ci ra yeno, bikero. Çimkî veşayîşê Koyanê Kazan çi bo, veşayîşê daristananê Dêrsimî zî eynî çî yo. Ganî merdimê ke rojawanî de yî, nêyî fam bikerî. Eke daristanî çinî bibî, her kes çinî beno. Eke ma heme pîya hereket bikerî, o wext heqê ma yê cuyayîşî beno.”
DÎHABER/STENBOL