Meclîsa Ciwanan a Konseya Bajar a Rêveberiyên Herêmî ya Amedê, bi dirûşmeya "Ji bo her gundekî pirtûkxaneyek" pirtûkxaneya 14'emîn li Dibistana Seretayî ya gundê Zoxbirîm a navçeya Hazro ya Amedê vekirin. Ciwanan bi merasimekê pirtûkxane ji xizmeta xwendekaran re vekir. Di merasimê de Kordînatorê Pirtûkxaneya Meclîsa Ciwanan Hasan Pekdogan, Kordînatora Meclîsa Zarokan Nazdar Kahramaner, Endamên Konseya Bajar, Seroka Meclisa Giştî ya Bajar a Amedê Fatma Sunbul, Midûrê Perwerdehiya Neteweyî yê navçeya Hazro Bayram Sezgin û xwendekar amade bûn.
Seroka Meclîsa Giştî ya Bajar a Amedê Fatma Sunbul, diyar kir ku projeya ciwanan a pirtûkxaneyên gundan pir bi wate û pîroz e û wiha got: "Mirovên li ser vê axê pir êşên mezin û giran kişandin. Ev pirtûkxane dê li ser jiyana mirovên ku derfetên wan tune bandorek mezin a erênî bike"Midûrê Perwerdehiya Neteweyî ya Navçeyê Bayram Sezgin jî ji ber vê hewldana ciwanan spasiyên xwe anîn ziman. Sezgîn, ji ber vê yekê plaket da Kordînatora Meclisa Zarokan Nazdar Kahramaner.
Kordînatorê Pirtûkxaneya Meclîsa Ciwanan Hasan Pekdogan, jî anî ziman ku hedefa wan li 42 gundan pirtûkxaneyan vekin. Pekdogan, anî ziman ku heta niha li Erxenî, Farqîn, Bîsmil, Çermûk, Lice, Hênê, Gêl, Çinar, Pasûr û Qulpê bi tevahî 13 pirtûkxane vekirine u herî dawî pirtûkxaneya 14'mîn jî li vir vedikin.


 DÎHA/AMED