Endamê Komîteya Berpirsyar a Komîteya Berhevkirina Îmzeyan  Xerîb Hiso destnîşan kir ku ne ji ber rewşa şer û pevçûnan de ba dê bi sedhezaran îmze bihatana berhev kirin, lê tevî ku bi hezaran welatî ji van taxa koçber bûne û ewlehiya Helebê ne baş e heta niha 10 hezar îmze hatine berhevkirin û hîn hejmar dê zêde be. Hiso, diyar kir ku welatî ji hemû pêkhateyan îmzeyên xwe ji bo azadiya Ocalan dan.  Derbarê firehbûna kampeya wan de jî Hiso ev tişt got: “Me xwest ku li taxên Suryan ya Kevin û Nuh û Şêx Xidir û taxên din jî îmzeyan berhev bikin lê ji ber ku hêzên rêjîmê di van taxan de hêzên xwe bi cih kirine me nedikarî xwe bighînin wan.”

Komîteya berhevkirina îmzeyan li Rojavayê Kurdistanê beriya niha diyar kir ku li seranserî Rojavayê Kurdisrtanê û Sûriyê 5 sed hezar îmze hatine berhevkirin û kampanî hîn didome.

Di festîvala çandê de îmzeyan kom dikin
Li aliyê din li bajarê Elmanya Munsterê, ciwanên endamên Yekitiya Xwendekarên Kurdistanê (YXK) yên tevlî Festîvala Çandê ya Havînê bûn, di çarçoveya kampanya îmzeyan a ji bo azadiya Rêberê Gelê Kurd Abdullah Ocalan û hemû girtiyên siyasî de, dezgehek danîn. YXK'yiyan ji xwendekaran re behsa jiyan û têkoşîna Ocalan kirin û îmze kom kirin.  
Xwendekaran di festîvalê de, di çarçoveya kampanya îmzeyan a ji bo azadiya Rêberê Gelê Kurd Abdullah Ocalan û hemû girtiyên siyasî de, dezgehek danîn. Xwendekarên Kurd ên li dezgehê Kurdistan û kampanya ji bo azadiya Ocalan dan naskirin, li pêwendiyeke mezin rast hatin.
Her weha qertên bi nivîsa "Ji hemû girtiyên siyasî yên li Tirkiyê re azadî" ku bi zimanên Kurdî, Farsî, Erebî, Tirkî, Endonezyayî, Elmanî, Îngilîzî, Spanî û Fransî hatibû nivîsandin, hatin belavkirin. Di çalakiya heta doh êvarê de, xwendekarên YXK'yî bi sedan îmze kom kirin. 

HELEB/MUNSTER