Îdareya Qersê yê Taybet 2 sal berê ji bona ku pirsgirêka hemwelatiyan çareser bike ji gundiyan 40 hezar TL pere kom kir. Lê hê jî pirsgirêka avê nehatiye çareserkirin. Ji ber sedema ku li gund ava vexwarinê a paqij tûneye li gund nexweşiyên şovê zêdeye. Ji gundê Çîrîklî Mahmût Oztemûr, anî ziman ku Îdareya Qersê yê Taybet ji bona ku pirsgirêka wan ya avê bê çareserkirin ji gundiyan 2 hezar TL kom kiriye lê pirsgirêka avê hêjî nehatiye çareserkirin. Oztemûr got, em ne dikarin xwe bişon, ne ji dikarin avê vexin. Em her tim li ber çavkaniyên xwe yê avê nobedarin. Extiyarên me ji bona ku ciwanê me li ser avê pevçûn nekin, tên li ber çavkaniya avê nobed digirin. Ev şermek mirovahiyê ye."


Av nîne serê xwe bişon
Ji heman gundê Fatma Oztemûr, diyar kir ku gundî ji kaniyê avê dilop dilop digrin û wiha pê de çû: "Em sibehê zu diçin ber kaniyê. Ji kaniyê av dilop dilop tê û em bi vî awayî pêwîstiyên xwe yê avê pêk tînin. Yê ku vê zilmê li me rewa dibîne îro dema hilbijartinê jî tê ray ji me dixwaze. Her tim bi eynî bahaneyan me dixapînîn. Em vê hilbijartinê rayê xwe bikarnaynîn. Zarokên me ji ber ku av tûne nikarin serê xwe bişon."

“Em perîşanin”
Li gundê Porsûk'ê jî Nûrettîn Ozkarakiş, destnîşan kir ku gundî ji ber pêwîstiya xwe yê avê kilometreyekê bi rê ve dimeşin û wiha berdewam kir: "Zorokên me perîşanin. Gazina me ji hikumetê û ji dewletê heye. Çima ev dewlet li me xedi dernakeve?" Ji heman gundê Fatma Erdagoz jî wiha axivî: "Em jî hemwelatiyê vê welatê ne. Çima ev zilm li me rewa dibînin. "

DÎHA/QERS