Li gelek navendên Almanyayê çalakî bê navber berdewam dikin. Kurdistaniyên pêr li ber Parlamenta Federal a Elmanyayê li hev civiyan, tevî şoreşgerên Tirkiyeyî, demokrat, Elewî û komên antî faşîst ên Elman, êrîşên qirkirina siyasî yên li dijî HDP’ê şermezar kirin.
Li bajarê Frîedrîchshafen ê li herêma Bodensee ya li başûrê Elmanyayê, Kurdistanî ji bo girtina hevserok û parlamenterên HDP’ê protesto bikin li Bûchhronplatzê li hev civiyan. Nûnerên Dîe Lînke û MLPD’ê jî li vir axivîn û destek dan gelê Kurd.
Swîsre û Awûsturya
Girtina hevserok û parlamenterên HDP’ê li bajarên Basel û Bîenne yên Swîsreyê hate şermezarkirin. Li Basselê Kurdistanî û dostên wan li ber avahiya Partiya Lîberal Radîkal (PRL) li hev civiyan, zext û zordariya AKP’ê şermezar kirin. Kurdistanî û dostên wan ên li Centrale Place ya Bîenne li hev civiyan, heta Stasyona Trenê ya Navendî bi meşaleyan meşiyan. Komên antî faşîst ên Swîsreyî jî piştgirî dan vê meşê.
Li paytexta Awûstûrya Viyanayê jî, bi şiyara ‘Dest nede vîna min” pêvajoyeke çalakiyan a ji bo hefteyekê dest pê kir. Çalakiya destpêkê li Mûseûms Qûartîerê pêk hat. Bi sedan demokrat li vê meydanê li hev civiyan û polîtîkayên AKP’ê şermezar kirin.
Japonya, Kanada, Awûstralya…
* OTTAWA: Kurdistaniyan li paytexta Kanada Ottowayê li ber Parlementoya Federal çalakiyên xwe didomînin. Kurd û dostên wan bi pêşengiya Meclîsa Gel a Kurd a Montreal hatin cem hev û qirkirina siyasî ya AKP/Qesrê şermezar kirin. Di çalakiyê de nêzî 500 kes hebû. Girse kolana Rîdeaûyê ji trafîkê re girt û ji vir derbasî konsolosxaneya Tirk bûn.
* STOCKHOLM: Kurdistanî û şoreşger û demokratên Tirkiyeyî bi mebesta şermezarkirina qirkirina siyasî li ber deriyê sereke yê Seroktiya Karê Derve yê Swêdê hatin cem hev û çalakiyeke protestoyî pêk anîn.
* TOKYO: Li paytexta Japonya Tokoyayê nêzî 100 kesê ku ji Kurd û Japonan pêk hatî, qirkirina siyasî ya li ser HDP’ê şermezar kirin.
* CANBERRA: Li paytexta Avûstralyayê Canbbera jî qirkirina siyasî hate şermezarkirin. Navenda Civaka Kurd a Demokratîk, Kurdish Lobby Avûstralîla, ÎHD Avûsralya, Nûnerê KNK Sydey Îsmet Taştan Parlementoya Federal ziyaret kir. Di hevdîtinê de Serokwezîr Malcol Turnbull, Wezîrê Karê Derve Julîa Bîsho û Penny Wong û wekîlê Partiya Karkir Peter Khalîl jî hebûn. Di hevdîtinan de êrîşên qirker ên Tirk hatin guftûgokirin û hate xwestin ku Avûstralya helwestê nîşan bide.
* MELBOURNE: Li paytexta eyaleta Vîctorîa a Avûstralyayê Melboûrneyê jî qirkirina siyasî hate şermezakirin. Li ser navê Partiya Keskan Nîna Sprîngle xwest ku wekîlên Kurd di zûtirîn demê de serbest werin berdan û got, Kurd teqez wê bigihijin azadiya xwe.
* ERÎVAN: Kurdistaniyên li Ermenîstanê dijîn, li paytext Erîvanê li dijî girtina parlementere û şaredarên bajarên Kurdan civîneke çapemeniyê lidar xistin.
NAVENDA NÛÇEYAN