Li gor nûçeya rojnameya el-Halic a li Mîrîtiyên Yekbûyî yên Ereban weşanê dike, Şêwirmenda Siyasî ya Serokkomarê Sûriyeyê Beşar Esad, Buseyne Şaban diyar kir ku piştî xwepêşandên li Sûriyeyê qewimîn û heta niha li welêt gelek reformên ku tu kesî nedikarî di xewna xwe de jî bibîni, pêk hatine.
Buseyne Şaban diyar kir ku di mijarên reformên rakirina zagona rewşa awerte ya li welêt, hilbijartinên nû û zagona partiyan de heta niha pêngavên girîng hatine avêtin û destnîşan kir ku pirsgirêka bingehîn a li welêt komên çekdar in û çapemeniya Rojava naxwaze ji vê yekê bawer bike.

Buseyne Şaban diyar dike ku di nava kesên xwepêşandanan li dar dixin de komên çekdar hene û evane cinayetan pêk tînin. Şaban got ku heta niha 800 polîs û eleşker hatine kuştin. Ji aliyekî din ve rewşa li meydanê jî wekî berê berdewam dike û hejmara kuştiyan zêde dibe û kêm nabe. Di xwepêşandanên roja sêşemê de jî 12 kes hatin kuştin. Her wiha muxalifên Sûriyeyê daxwaz kirin ku amargo li ser firîna balefirên leşkerî ên Sûriyeyê were danîn da ku nikaribin bajaran topebaran bikin.

ŞAM