Rayêka ke Amed ra şina Çewlig û şina Mûş. Zehf cayande serê reyan ra noqta nawa ro wesaîtan vindarnenê. Heme hetê wesaîte geyrenê, awnenê. Rêwîyêku zerê wesaîte de nasnamê yine cira genê. Ewca her away teknîk pêk anê. Verpersê GBT kenê. Biwazê bi rocan herema operasyonî de telefonanê şarî birnenê. Şîyayişê Amed ra Qeraz, Licê, Çewlig, Pasor esto, verdenê. La ti nêşkenê şêrê yew dewe zî. Reya her dewe ser polis û leşker yê ke semedê operasyonan wezîfe girewta bi çekê herî giranan reyanê dewe sero bicakerdê. Nêverdenê yew wesaîte derbas bibo. Merdim vîneno zehf hetan ra duman wirzeno. Adir kewto yê dewan û daristanan. Dewê ya mintiqadê dew û daristanî tê miyan de. Her dewijî zî bi seyan dara fêkî nawa ro.
Debara şarê yê dewan darê fêkîyan, zerzewat û warî kerdişê heywanan o. Hema kêyan muheqeq çend mangê şitî estê. Hingêmînî zî estê. Na mintiqa de ewro nîrê debaro.
Cew û genimêko payizî ameyo ramitiş wextê çinayişê yino. Erdê bînî zî temam kerdê zerzewat. Pêro erdê sebze û meyweyî yê. Bi nê operasyon û tebernêkewtişê kêyan ra dewican bê debar verdenê. Kamco erd; sebzî tutûn û pemî heftêk nêro awdayiş wişk beno. Dewar û heywan ê mintiqade wesar ra heta payizê peyin pesara çereno. Heme der û dor zey merêko. Şewatêko yeno vetiş heme çî vêşneno. Verê çimanê ma hemine de mintiqa yena vêşnayiş. Heman wext de televizyonan de ma vînenê zehf cayê Tirkîya de şewatê daristanan vecyeno. La çiqas îmkan û derfetê hikumetî û yê şaredarîyan esto seferberbenê. Adir hewna kenê.
Zaf cayan de bi teyaran û helîqopteran mudaxele kenê. Hêzê leşkerî zî hetkarî kenê. Şewatê daristanê Antalya de ame vînayiş. A bêro kerdiş zî aya. La ti bê bawne çiyêko erdnîgarîya Kurdistanî de virazyenê ecêbê giranê. Kamco mintiqa de bi namê operasyonî polis û leşkeri şêrê, helîqopter û teyarê şerî bigeyrê a mintiqa de şewat virazyeno. Şar ke biwazo û wazeno zî adirî hewnakero leşker û polîsî nêverdenê. Benê asteng. Hênî nizdî de semed şewatê ke dewan de vecyabe. Dewican hewarê xo arde şaredarîyanê der û dor û rayberê partîya ke pê bawera; yê zî hewarê yine de şî la mixabin mintiqa qeraqola Korxê de 74 kesî hetê leşkerî ra amey tepiştiş. Şewêk Licê de bine çiman de mendî ewca ra sewqê Amedî kerdî. Roca çarine vetî dozger bar. Badê îfadedanê dozgerî semed bêrê tewqîfkerdene şirawitî hakimî bar. Heme amey beradayiş. La qismêk yine ra bi şertêko go hefte ra di rocî îmze bidê amey beradayişî. Lazim o xelate bêrê dayiş la ceza amey birnayiş. Gelo meqsed vengkerdişê mintiqawo?
Nesîp Gultekîn