Serekîya Dayîreyê Cayanê Zerguninan û Parkan ya Şaredarîya Bajarê Girdî ya Amedî, Suka Ataturkî ya Licê de Meydanê Bajarî awan kena. Meydanê Bajarî cayêkê 5 hezar 700 metrekare ser o yeno viraştiş û 4 hezar 200 metrekareyê ci beno cayo zergun. Xebata Meydanê Bajarî aşma temmuze de dest pêkerde, berdelê îhaleya ey 339 hezar lîre yo û hetanî peynîya serre yeno temamkerdiş.
Cayo tewr pîl seba zergunî yo
Serekê Dayîreyê Cayanê Zerguninan û Parkan yê Şaredarîya Bajarê Girdî A. Samet Uçamanî derheqê xebate de zanayîş daû wina va: “Ma qezaya Licê de aşma temmuze ra dest bi înşaatê Meydanê Bajarî kerd. Xebata viraştişê sîstemê awdayîş, ceyran, drenaj û awa şimitişî dewam kena. Ma hetêk ra semedê meydanî dar û nebatan weçînenê hetêk ra zî pergole, bank, qûtîyê çopan û mobîlyayan hadre kenê. Meydanê Bajarî de cayo tewr pîl semedê zergunî yo.” Uçamanî îzah kerd ke Meydanê Bajarî yo ke yeno viraştiş merkezê qeza de ca gêno û kenê ke hetanî peynîya serre înşaatê cayî biqedînê.
Di projeyê cîya ameyî sentezkerdiş
Uçamanî îzah kerd ke Meydanê Bajarî de bantê rayşîyayîşî zî estê û wina va: “Ma projeya Parke û ya meydanî kerde sentez. Bi no qayde na xebate vejîya orte. Hetêk ra cayê zergunin û amfiyê ma estê hetêk ra zî meydano ke her tim falîyet de yo virazîyeno. Seke yeno zanayîş Licê de cayê aktîvîteyan û cayê sosyalbîyayîşî kêm ê.
AMED