ALVA OSÊ/SLAVA ÎBRAHÎM/ANHA/ŞENGAL
Çend rojî verê derheqê îdareyê Şengalî de Projeyê Îdareyê Xoserîya Demokratîke ya Êzidxanî amebî aşkerekerdiş û xeylê hetan ra piştî dîyabî/dîyeno nê projeyî.
Babete ser o Fermandaranê Yewîya Xoverdakaranê Şengalî (YBŞ) Seîd Hesen Seîdî qisey kerd.
Fermandar Seîdî destpêkê qiseykerdişê xo de qetlîyamê ke vera êzidîyan de bîyî şermizar kerd û qiseykerdişê xo wina domna: “Seba ke pêşmergeyê PDKyî remayî û hêzê xopawitişî yê şarê Şengalî çinêbî, şar terorê çeteyan reyde rî bi rî mend, Fermanê 73. virazîya. YBŞyî no het de xo îspat kerd. YBŞyî nîşanê herkesî da ke eşkeno sîvîlan vera hêrişan de bipawo.”
Ma amade yî bipawî
Fermandar Seîdî dewamê qiseykerdişê xo de qala Projeyê Îdareyê Xoserîya Demokratîke yê Êzidxanî kerd û wina va: “Ma sey YBŞ parçeyê nê proje yî. Çimkî hêzê pawitişî yê Şengalî yî û şerwanê ma şengalij î. Ma do bi heme hêzê xo nê projeyî û hêrişanê bînan yê dewlet û hêzanê bînan bipawî. Ma pawitişê şarê xo rê amade yî.”