KAMÎRAN XOCE / ANHA /MINBIC
Rayberê Şarê Kurd Abdullah Ocalanî ra nizdîyê 2 serrî yo ke ti xebere nîna girewtiş û nizdîyê 7 serrî yo ke avûkatî nêşênî şêrî pêvînayîş bikerî. Tewr peynî medyaya komelkî ser o tayê xeberî vila bîyî û kurdî û dostê kurdan derheqê weşî û ewleyîya Ocalanî de etirîyenî.
Bi hewteyan o ke kurdî û dostê kurdan Kurdistan, Tirkîya, Ewropa û sewbîna xeylê cayanê dinya de weriştî payan ser û hêrsê xo nîşan danî. Ciwanê Minbicî ke bi saya fikrê Ocalanî bindestîye ra xelisîyayî, tecrîd ser o qisey kerdî.
Endamê Îdarekarîya Komîteya Wendekarê Demokratîke yê Bajarê Minbicî Hisên El-Ehmedî wina va: “Badê ke ma perspektîfê Rayber Ocalanî wendî, ma rolê xo yê komelî nas kerd. Reyna ma dî ke rolê ciwanan çiqas îdarekarîya komelî de muhîm o. Nika ciwanê şorişgêrî saya perspektîfê Ocalanî de seba awankerdiş û averberdişê bajarê xo têkoşîn danî.”
Minbic saya Ocalanî de rizgar bî
Endamê Îdarekarîya Meclîsê Ciwanê Minbicî Sultan El-Ehmedî zî va ‘verê cû ti hêzê ciwananê Minbicî yê qerardayîşî çinêbî’ û wina domna: “Labelê badê ke ciwanan perspektîfê Rayber Ocalanî nas kerdî, nika hewl danî welat, komelêko azad û demokratîk awan bikerî. Ciwanan rayîrê xo yo rast weçînayî û nika bi rolê rayberîye de heme dezgehan de xebetîyenî. Yew serre û nîm o ke Minbic bi perspektîfê Ocalanî ameyo rizgarkerdiş.”
Ciwanan sozê azadkerdişî dayî
Endama Îdarekarîya Tevgerê Cinîyanê Ciwanan Meryem Xelîfe zî wina va: “Rewşa ciwanan yew serre û nîme verê ra zaf cîya ya; êdî ciwanî gamê girdî eştî. Ciwanî qerardar î û şarî bi çalakîye îdare kenî. Labelê nika lazimîya ciwanan bi têkoşînêko hîna hîrayêr esto. Ancax bi ê têkoşînî resenî heqîqete. Ciwanê ke Rayber Apo qala ci keno û perspektîf dano înan, ciwanê ke raştîya xo şinasnenî yî.”
Ciwananê Minbicî dîyar kerdî ke ê do vera tecrîdo hetê hukmatê AKPyî ra yeno bicaardiş de bêveng nêmanî û sîyasetê hukmatê tirkî yê vera Rayberê Şarê Kurd Abdullah Ocalanî de şermizar kerdî. Ciwanan soz dayî ke ê do bi vengêko berz azadîya Ocalanî biqîrî.