Ma bi tilîlîyan înan de şer kerd

NAZIM DAŞTAN / MA/GIRÊ SPÎ

Hêrişê dagîrkerîye ke hetê artêşa Tirkî û çeteyanê ci ra vera Vakur û Rojhelatê Sûrîye de ameyî destpêkerdene roja 10. de zî dewam kenî. Artêşa Tirkî û çeteyê ci ke 10 rojî yo bi teyara, tanq, top û sîlehanê giranan hewl danî dagîrkerîya xo awan bikerî.

Şervanê QSDyî zî vera artêşa Tirk û çeteyanê ci de bi îradeyêka girde xover danî û heta nika derbê girdî dayî dagîrkeran ro. Têkoşînî mîyan de rolê şervananê cinîyan zî zaf gird o. Yewîyê Pawitişî yê Cinîyan (YPJ) destûr nêdanî ke dagîrkerî derbaz bibî. Şervananê cinîyan ra yewe zî Arîn Kobanê ya.

Arîn Kobanê dîyar kena ke ê vera tanq, top û teyarayan de vindenî û wina vana: “Ma do bawerîya şaran veng nêvejî. Ma do embazanê xo yê şehîdan xo vîr ra nêkerî û hewl bidî ke hîna zaf şer bikerî. Înan zaf cayan de ma cerebna, labelê ma cewabê înan da. Ma tanqanê înan îmha kerdî. Ma bi tilîlîyan înan de şer kerd. Ê tarzê ma yê şerî zanî. Ma cinîyî do erdanê xo bipawî. Nê erdî, erdê şehîdanê ma yî.”

Şervananê cinîyan ra Vîyan Rojava zî bale ante heqdarîya xo ser û wina va: “No şer de ê heqdar ma yî, çimkî dişmen hewl dano erdanê ma dagîr bikero. Ma do têkoşînê embazanê şehîdan zî bidomnî. Wa dişmenê ma naye bizano; ma do destûr nêdî ke erdanê ma dagîr bikerî. Ma do înan dewe û wareyê ke kewtî ra zî vejî.”